1 Miye nanyilikila kwako,

nisekwingila soni.

2 Mwo uwagilwa wako nambize na kuniyokola.

Nitegeleze na kukombola!

3 Unde unyilikilo wangu,

naho unde gomela dyangu ditogile dya kuniyokola,

kwaviya weye ni unyilikilo wangu naho gomela dyangu.

4 Niyokole weye Mnungu kulawa mwa want'hu waihile,

mwo udahi wa makwank'walu na waihi.

5 Kwaviya weye Zumbe ni weye kawiilo dyangu,

hikuhuwila weye kukongela kwo ubwanga wangu.

6 Nakukawiilaga weye kukongela kwo kwelekwa kwangu,

kwaviya ni weye unilavile mwe nda ya mnala.

miye nohutunye haheina uheelo.

7 Hinda kilozo kwa want'hu,

mna weye niwe unyilikilo wangu utogile.

8 Miye nakutunya mazua yose,

na kuubwelekeza ukulu wako kilo na msi.

9 Hadalahala use kuniduula

hasiilwa ni ludole usekunasa.

10 Kwaviya wank'hondo wangu walonga yaihile mwangu,

wadya wakuunga wanikome waika mizungu iihile.

11 Hambwe wagamba, "Mnungu kamwasa

mguluseni mumgwile,

kwaviya hahali yeyose naamyokole."

12 Weye Mnungu ywangu, usekwikala hale na miye,

Sunguza uniyokole weye Mnungu.

13 Wose wakunikump'hukila wahumwe na kuuswa pele,

wadya wakuunga wanilumize wagelwe soni na kinyulu.

14 Mazuwa yose neniike kawiilo dyangu kwako,

nohutunye na kukutunya mazuwa yose.

15 Mnomo wangu noulonge udamanyi wako wo uwagilwa,

udamanyi wo uyokozi wako msi wose,

hata uneva ayo yajink'ha ubala wangu.

16 Nenize nibwelekeze udamanyi wako mkulu weye Zumbe Mnungu,

nenibwelekeze uwedi wako weye wikedu.

17 Wanihinizaga kukongela kwo ubwanga wangu,

naho nagendeela kubwelekeza udamanyi wako wa kwehela.

18 Hata hadalahala na kunda na fi,

usekunileka weye Mnungu ywangu,

mpaka nibwelekeze udamanyi wako mkulu kwe vyeleko vikwiza.

19 Uwagilwa wako wabula kwe mbingu.

Kudamanya mbuli zikulise,

hahali yeyose enga weye.

20 Kunink'ha makunt'ho na masulumizo,

mna nounivuze naho mwo ugima.

Nouniuyule naho kulawa kwe kikuta.

21 Nounongezele nt'hunyo yangu,

na kunigela moyo naho.

22 Nohutunye hatowa kinubi,

neniutunye uhuwilwa wako weye Mnungu ywangu.

nohu kemele nt'hunyo ne kinubi changu,

weye ukukile ywa Izilaeli.

23 Nenikweze izwi kwa kinyemi,

umwo hakukemela weye nt'hunyo zako,

name nohutunye kwaviya kuniyokola.

24 Nenisimuile uwagilwa wako msi mgima

kwaviya wose nawakaunga wanilumize

watoigwa na kugelwa soni.