1 Want'hu wose yangeni kwa kinyemi na kumtunya Mnungu.

2 Ukemeleni ukulu we dizina dyakwe,

mwink'heni nt'hunyo zo ung'azi wakwe utendes.

3 Mgambeni Mnungu, "Udamanyi wako ni wa kweheelesa,

udahi wako ukulisa,

vikuleka wank'hondo wako wenamiza mitwi yawe hasi kwa kukogoha weye.

4 Isi yose yenamiza mitwi yawe hasi ahako,

wakema nt'hunyo kwako,

ukemi wa kuditunya dizina dyako."

5 Hake soni, mkaule icho adamanye,

kadamanya ya kweheela mwa want'hu.

6 Aihitulaga ibahali kuda hant'hu hanyaile,

wakale wetu wadendelukaga ibahali ne viga vawe.

hadya chaonaga kinyemi mwe kiya adamanyaga.

7 Yehe ekaila si kwa udahi wakwe mazuwa yose,

na kuwakaula wa mwe isi.

Yeyose asaguke ase kuhigana naye.

8 Nyuwe want'hu wa isi zose, mtunyeni Mnungu,

maizwi ye zint'hunyo zenyu nayevike.

9 Yehe kakiika kunda wagima,

naho hakilekile suwe kigwe.

10 Kukihima weye Mnungu,

kukigeza

kukisunt'ha mwo moto enga shaba.

11 Kukileka kigwiligwe mwo lwinika,

na kukigela mwa makunt'ho yakulumisa.

12 Kuwaleka wank'hondo wakijatangize,

chombokela mwa mazi na mwo moto,

mna kukibuza hant'hu hatondowale.

13 Nenize kwe nyumba yako na malavo ya kokwa pele,

nenikint'hize kiya hulagane kwako.

14 Nohwink'he kiya nalongile,

kiya nalagane umwo nandile mwa makunt'ho.

15 Nohulavile malavo yo kokwa pele, mifugwa igimbale,

nt'hambiko ya ndolome,

nenilave ng'mbe na mbuzi.

16 Soni nyuwe mkumvika Mnungu,

name neniwagambileni kiya anidamanyile.

17 Namlombezaga wambizi,

namtunyaga kwa kumkemela.

18 Wandile naikile wavu mwo moyo wangu,

Zumbe hegu hanitegeleze,

19 mna ikindedi Mnungu kaniva,

kayategeleza niyo anink'ha yadya nimlombeze.

20 Namtunya Mnungu

kwaviya halemele kulombeza kwangu

hegu kunilemela mwo lukunde lwakwe holukusila.