1 Zumbe Mnungu wive ndilo yangu ye kindedi,

wive kuila kwangu,

tegeleza kulombeza kwangu hokwiina nyambi.

2 Uwagilwa wangu wize kulawa kwako,

kwaviya weye kumanya mbuli zo uwagilwa.

3 Weye kumanyisa ivo nili,

kwiza nekilo kunipelemba,

Kunigela mwe magezo,

huone wiihi mwangu,

hyalongaga kint'hu kiihile.

4 Mwo udamanyi wa want'hu,

miye hikuzumila weye,

hikesumsa na sila za waihile.

5 Hitimila sila zako mazuwa yose,

naho hidamanye yaihile.

6 Nakwitanga Mnungu ywangukwaviya weye wanitika,

nakulombeza wive kulombeza kwangu.

7 Unilagise udamanyi wako mkulu wa kweheela,

weye ukukombola kwa udahi wako,

wadya wakugulukila utondowazi kwako.

8 Unamile enga ziso,

unifise mwa mawawa yako,

9 kulawa kwa wiihi wakunisulumiza

hale na wank'hondo wangu wakunizunguluka.

10 Awo hawana mbazi mwe mioyo yawe,

wamema mbuli za kukeduvya.

11 Wanitimila na kunizunguluka,

waninyatila wanikinye hasi.

12 Wekeika lumwe wanibwant'he enga simba,

enga mwana simba akongola.

13 Inuka Zumbe Mnungu,

towana nawo na uwahume,

kwa jambia uyokole wikazi wangu kulawa mwa waihi.

14 Kwa udahi wako Zumbe Mnungu,

uniyokole mwo udahi wa want'hu,

awo wakuungisa vint'hu va mwe si du.

wawegusa kwa kuwenk'ha ugoli mwingi

uwo wakuwalekela wana wawe,

usigale nawo wawalekela wezukulu wawe.

15 Mna miye neniuone udahi wako kwaviya hina idyo nibanange.

Henuka neninde na kinyemi umwo hakuona weye.