1 Weye Mnungu unionele mbazi,

kwajili yo lukunde lwako,

uuse wavu wangu.

kwo wingi we zimbazi zako.

2 Nisunt'he maihi yangu yose

naho unitende nikuke, nilawe mwo wavu.

3 Kwaviya hiyamanya malema yangu,

naho wavu wangu nauwona lupisi lwose.

4 Miye hikutendela wavu,

naho hidamanya maihi ho undiilo wako;

Weye unde muwagilwa mwo kunisengela,

usengelo wako haukukalalizwa.

5 Miye ni mwiihi kulawa mwo kwelekwa kwangu,

nenda mta wavu kukongela aho nenuilwagwa ubovu kwa mwelesi ywangu.

6 Ikindedi, weye welelwa ni kindedi kikulawa kwo moyo.

Unihinize mizungu kundani kwo moyo wangu.

7 Unisunt'he na kosombwe kakwitangwa hisopo name neninde hikuka,

uusunt'he moyo wangu nawo noung'ale mbee.

8 Unitende ninde na kinyemi na kwanga,

yatende yande na kinyemi mavuha yadya uyahondile.

9 Usekuukaula wavu wangu,

uuse uwihi wangu wose.

10 Umba moyo ukukile mwangu weye Mnungu,

unink'he miye moyo mh'ya naho wedi.

11 Use kunigulusa ho undiilo wako,

use kuusa mwangu muye wako ukukile.

12 Nivuzile kinyemi cho uyokozi wako,

unitende nikawiile kudamanya yadya ukuunga.

13 Aho niho neniwahinize wata wavu zisigilizi zako,

nawo nawakuwiye.

14 Uniyokole mwa masa yangu yo ukomi weye Mnungu, Mnungu ywo uyokozi wangu,

lulimi lwangu nolukeme kwa izwi kulu dya kinyemi kwajili yo uwagilwa wako.

15 Weye Zumbe unambize nilonge

mnomo wangu ubwelekeze zint'hunyo zako.

16 Vandile kikukwelela ni nt'hambiko,

hegu nehikulavila,

mna weye hukwelelwa ni malavo ya kokwa pele.

17 Nt'hambiko ya kukwelela weye Mnungu, nu moyo wa kweseleza,

moyo wa kweiila kwako Mnungu houubele.

18 Kwa kuunga kwako uutendele uwedi mzi wa Sayuni,

uzizenge uhya zink'handula zo mzi wa Yelusalemu.

19 Niho nowelelwe ni nt'hambiko za uwagilwa,

na malavo yetu yo kokwa pele,

majeku nayo nayalavigwe kunda malavo hant'hu ha kulavila nt'hambiko.