1 Niyokole weye Mnungu kwaviya mazi yanibula mwe singo.

2 Natotohela mwe nt'hope,

hehekudahika kukimala,

Hididimila mwa mazi matali,

mazi nayo yanijubwanisa.

3 Hisokezwa kwa kulombeza wambizi,

dilaka dyangu nadyo dinyala,

meso yangu nayo yadumila unk'hundu,

hakukawiila weye Mnungu.

4 Wakuniihiya haheina lema,

uwingi wawe ujink'ha wingi we zifili zangu.

Wank'hondo wangu walonga lulimi mwa miye,

wana ludole naho waunga wanikome.

awo wakunikumphukila kwa mbuli za udant'hi.

Togola nivuze kint'hu hikibaile?

5 Weye Mnungu kuumanya uhezi wangu,

malema nidamanye hayakefisile vileke use kuyaona.

6 Miye nisekuwagela soni wadya wakukuhuwila,

weye Zumbe Mnungu ywo udahi,

weye Mnungu ywa Izilaeli,

wadya wakukuvika, wase kwingila kinyulu kwajili yangu.

7 Kwaviya hingila kinyulu kwajili yako,

naho meso yangu yengila soni.

8 Miye hinda mtakwiza mwa wandugu zangu,

enga mnt'hu heemanyike mwa want'hu wangu.

9 Lukunde lwangu kwako lwanikoma,

nk'halalizi zose wakukukalaliza zimwangu miye.

10 Nize nikeseleze kwako kwa kufunga,

want'hu wanibelaga.

11 Hakevala mavalo ya kuhongeza,

woho waniseka.

12 Umwo mwe zisila want'hu wanisimuila,

wakozi nawo wanituila wila.

13 Mna miye nalombeza kwako weye Zumbe Mnungu.

Nik'he uhituzi weye Mnungu mwo lupisi lukukwelela.

Nink'he uhituzi kwajili yo lukunde lwako lukulu,

kwa wambizi wako wa uhuwilwa,

14 uniyokole nifose mwo kutotohela mwe nt'hope

unihonye na awo wakuniihiya,

unilave mwa mazi matali.

15 Usekuleka mazi yakanikubila,

hegu kudidimila mwa mazi matali

na kumeligwa ni isi ya want'hu wabanike.

16 Zumbe nink'he uhituzi mwo uwedi wo lukunde lwako holuukusila,

unihitukile kwajili ye zimbazi zako.

17 Usekuleka kumkaula mndima ywako,

nink'he uhituzi kwaviya ni mwa makunt'ho makulu.

18 So uniyokole,

unikombole kwa wank'hondo wangu.

19 Kuvimanya ivo hugeligwa mabelo,

ivo nigeligwe kinyulu,

haheina kutunywa.

20 Kugeligwa mabelo kunigela chevu,

naho hingila usokezi,

higoja ywa kunigela moyo mna himuone,

ywa kunihoza mna hahali.

21 Umwa nandile na sala woho wanik'ha vikukoma,

wanink'ha siki umwo nandile na nk'hilu.

22 Fugo zawe zinde mitego yawe wenye,

mazuwa ya kinyemi ya malavo yawagwile wenye.

23 Wagele unt'hunt'hu wase kudaha kukaula,

migongo yawe nayo igolome mazuwa yose.

24 Wakupuile maya yako

maya yako yawabwiile.

25 Nk'hambi zawe zinde mahame,

nk'hambi zawe zisekwikalwa ni yeyose.

26 Wawasezenga wadya weye uwasulumize,

wasimuila masulumizo ya wadya uwalumize.

27 Ika nk'humbukila zo wavu wawe,

usekumwink'ha yeyose hant'hu mwo uyokozi wako.

28 Mazina yawe yafutigwe mwe kitabu cho ugima,

usekuwahanganya mwo ludongo lwa wawagilwa wako.

29 Mna miye ni mnyonge naho nna usungu,

we Mnungu ninule naho uniyokole.

30 Neniditunye dizina dya Mnungu kwa ukemi,

name nenibweleke dizina dyakwe kwa kumgamba nivedi.

31 Ino neimwelele Zumbe Mnungu kujink'ha kumlavila ng'ombe,

naho kujink'ha kumwink'ha jeku dikulise.

32 Umwo wabeligwe wakaona ivi, nawande na kinyemi,

wose wakumvika Mnungu nawagelwe moyo.

33 Kwaviya Mnungu aweva want'hu wakwe heweina kint'hu,

naho haawajale want'hu wakwe watahigwe.

34 Nyuwe zimbingu ne zi isi mtunyeni Mnungu,

hamwenga ne bahali na vose vimndani mwakwe.

35 Kwaviya Mnungu naaiyokole Sayuni,

na kuizenga uhya mizi ya Yuda,

want'hu wakwe nawekale umwo na kunda yawe.

36 Welekwa wa wandima wakwe nawande wakipe we mizi iyo,

naho wose wakumuunga nawekale uumwo.