1 Nyuwe want'hu wangu mwive icho huhiniza,

muitegeleze milosi yangu.

2 Nenilonge na nyuwe kwa malango,

mbuli hezamnyikaga kulawa uko kale,

3 ni mbuli kizivile naho kizimanya,

mbuli chasimwiilwagwa ni wakale wetu.

4 Hekiwafise wana wetu

ne kikigambile cheleko kikwiza,

udahi mkulu wa Mnungu no udamanyi wakwe,

vint'hu va kweheela ivo adamanye.

5 Kawenk'ha imiko want'hu wa Izilaeli,

niyo awagamba wakale wetu

wawahinize wana wawe zisigilizi,

6 vileke cheleko kikwiza kizimanye

hamwenga na wana nawelekwe, woho nawo weze wawahinize wana wawe.

7 Niho nawamhuwile Mnungu

naho hawajale udamanyi wakwe

mna nawatimile zisigilizi zakwe.

8 Wasekunda enga wakale wawe,

cheleko cha wahigani na wasaguke,

hewekumhuwila Mnungu,

cheleko hekiina uhuwilwa kwa Mnungu.

9 Want'hu wa Ifulaimu wakekakile nyuta na misale,

wanyilikaga mwe dizuwa dye nk'hondo.

10 Hawatozaga indagano ya Mnungu,

walemelaga kutimila sigilizi yakwe.

11 Wajalaga yadya adamanyaga,

vihungi ivo awalagisaga.

12 Adamanyaga vihungi wakale wawe wakasinya,

uko Soani kwe isi ya Misili.

13 Aipangaga ibahali niyo awombosela uumwo,

aitendaga ibahali ikimale enga lukazi.

14 Nomsi awalongozaga ne divunde,

kilo chose awalongozaga kwa ung'azi walawaga mwo moto.

15 Alutulaga uluwe mwe nyika,

niyo awanywesa mazi yabindile wingi enga mazi ya bahali.

16 Atumbulaga mazi kulawa mwo luwe,

niyo yaseela enga mto.

17 Mna wagendeelaga kumtendela wavu,

naho niyo wasaguka kudya kwe dijangwa.

18 Wamgezaga Mnungu kwa kasidi,

kwa kuunga nk'hande iyo waungaga woho.

19 Walonga vihile kwa Mnungu wakagamba,

"Ivo Mnungu adaha kukink'ha nk'hande mwe dijangwa?

20 Ni kindedi, Mnungu autowaga uluwe,

niyo mazi yatumbuka enga mto,

mna adaha kukink'ha nk'hande?

na kuwenk'ha want'hu wakwe nyama?"

21 Naivo niyo Mnungu anda na maya kwajili yawe,

niyo moto wa maya yakwe wakwelezwa mwa welekwa wa Yakobo

naho helelwe nawo want'hu wa Izilaeli,

22 kwaviya hawamhuwilaga Mnungu,

naho hawahuwile udahi wakwe wo kuwakombola.

23 Hata ivo alongaga no ulanga,

na kukomola zinyivi za kwe mbingu,

24 niyo awetiila mana vileke wadye

akwenk'ha nk'hande ya kwe mbingu.

25 Ivo want'hu wadyaga nk'hande ya watumigwa wa kwe mbingu,

naho Mnungu awenk'haga ludyo lwa kuwakint'ha.

26 Alekelaga mp'heho ya ulailo wa zuwa ivumile

naho kwa udahi wakwe kaitenda imp'heho ya kwa mwenye mzi nayo ivumile,

27 Awegaiala want'hu wakwe nyama nyingi enga luvumbi,

uwingi we videge enga msanga wa mnk'handa mwe bahali,

28 Mnungu avitomosaga videge ivo mwe nk'hambi yawe,

na kila hant'hu kuzunguluka mahema yawe yose.

29 Ivo want'hu wadyaga na kusigaza,

kwaviya Mnungu awenk'haga kiya waungaga.

30 Mna umwo wandaga wakei kubinda ink'hande iyo waiungaga,

naho yandaga ikei mwe milomo yawe,

31 maya ya Mnungu nayemukwaga kwajili yawe,

niyo awakoma want'hu wata ludole

na kuwakinya wabwanga wa Izilaeli.

32 Hamwenga na aya yose wagendelaga kudamanya wavu,

hamwenga ne vihungi vakwe hawamhuwile.

33 Ivo elo, akant'hikizaga miaka yawe enga muye,

wikazi wawe kwa file za kwitukiza.

34 Naho Mnungu eze awakome wamwenga wawe,

wadya wasigale wamuuiyaga,

wakweiilaga niyo wamhitukila kwa mioyo yawe yose.

35 Wakumbukilaga naho kugamba Mnungu nuyo unyilikilo wawe,

naho Mnungu ekulanga niye mkombozi ywawe.

36 Mna wamdant'hiizaga kwa ayo wamgambilaga,

milosi yawe kwakwe yandaga ni lulimi du.

37 Hawandaga naye kwa kindedi,

wandaga hiyo wahuwilwa kwakwe.

38 Mna Mnungu andilisaga na mbazi kwa kwa want'hu wakwe,

Awausilaga wavu wawe,

hawakomile pele,

nk'hanana zose avuzaga kunyuma usengelo wakwe,

aselezaga amaya yakwe yatendese.

39 Akumbukilaga kugamba woho ni want'hu du,

wekala enga luheho du lukomboka holwiikuuya naho.

40 Nk'hanana nyingahi wandaga wakamsaguka kudya kwe nyika?

naho wamgelesaga kinyulu kudya kwe dijangwa!

41 Naho wandaga wakauiya uiya kumgeza Mnungu,

na kumgela usungu uyo Akukile ywa Izilaeli.

42 Hawakukumbukila udahi wakwe mkulu,

kwe dizua awalavaga kwa wank'hondo wawe,

43 mwe dizuwa alagisaga vihungi kudya Misili,

mbuli za kweheela kudya kwe isi ya Soani.

44 Imito aitendaga kunda sakame,

Wamisili hawadahaga kunywa mazi ya mwe mito yawe.

45 Awakupuilaga matuluma ya sofulo yawagelaga nk'huswa nk'huswa,

na majula ayo yabanangaga isi yawe.

46 Naho awegailaga mp'hasi zadyaga vihandwa vawe,

na sige zabanangaga ulozo wawe.

47 Fula ya maiwe yakocholaga zizabibu zawe,

heho kulu niyo dyakungudisa maziti yawe.

48 Alekaga zing'ombe zawe zinyeelwe ni fula ya maiwe,

niyo ayatowa mafyo ye mifugwa yawe kwa lukuwa.

49 Ayalekelaga maya yakwe mwawe,

maya yatendese, kuihiwa kwakwe, makunt'ho, enga fyo dya watumigwa wa kwe mbingu wo ubanangi.

50 Alekelaga maya yakwe yagendeele,

hawahonyile wase kubanika,

mna awakomaga na maine.

51 Awakomaga nt'hula sasu wose wa Wamisili,

wose welekwe nk'hongo mwe mp'huga ye dihema dya Hamu.

52 Niyo awasamiza want'hu wakwe enga fyo dya mifugwa,

awalongozaga mwe dijangwa enga ngoto.

53 Awalongozaga vedi haheina kogoha,

mna ibahali niyo yawakubila wank'hondo wawe.

54 Awegalaga kwe isi ikukile,

kwe milima aitahaga mwenye kwa udahi wakwe.

55 Awagulusaga want'hu wa si nt'huhu kwajili yawe,

niyo awapangila isi inde ukipe wawe,

na kuwahumuza Izilaeli mwe isi yawe.

56 Mna wamgezaga Mnungu,

naho wasaguka kwa Mnungu mta udahi,

hawatimile zisigilizi zakwe.

57 Nivo wandaga wakale wawe,

wandaga waiha naho hi wa kukawiilwa,

wandaga enga uta hewiina ndima.

58 Wamwiihizaga Mnungu kwa vilingo vo kuivika milungu yawe,

wakwezelaga wivu wakwe kwajili ya mahili yawe.

59 Mnungu engilaga maya eze ayaone ayo,

niyo awalemela Izilaeli kindedindedi, kugamba hiyo wakwe.

60 Aulekaga ukalo wakwe kudya Shilo,

dihema adiikaga mgati mwa want'hu.

61 Adilekelaga disanduku dye ndagano ditahigwe,

ung'azi wakwe mwe mikono ya wank'hondo.

62 Niyo awenk'hiza want'hu wakwe wachinjigwe kwa sime,

na kuuihiya ukipe wakwe.

63 Moto wawakomaga wana kilume wawe,

wanakike wawe hawakemelwe mila ya ndoza.

64 Walavant'hambiko wawe wakomwagwa ni zisime,

wafiilwe ni wagosi zawe walemezwagwa kuhongeza.

65 Niho Zumbe anukaga enga ivo mnt'hu akulawa mwe zint'hongo,

enga mtowani akuleukwa mwe mwo ukozi.

66 Awatowaga wank'hondo na kuwahuma,

niyo awagela soni za mazuwa yose.

67 Mna wawalemelaga welekwa wa Yusufu,

naho dikabila dya Ifulaimu hadisagule,

68 vituhu vakwe kasagula dikabila dya Yuda,

no mnima wa Sayuni uwo auungisaga.

69 Ahazengaga hakukile hakwe,

enga kaya yakwe ya kwe mbingu,

itogile mazuwa yose.

70 Amsagulaga Daudi mndima ywakwe,

amlavaga uko kwa madimilo ye zingoto,

71 kulawa mwo udimi we zingoto,

amtendaga ande mdimi ywa want'hu wa Yakobo,

mdimi ywa Izilaeli awo wakipe wakwe.

72 Daudi awadimaga kwa moyo wedi,

na kuwalongoza kwa mizungu.