1 Unigombele weye Zumbe Mnungu,

kwaviya nadamanya ayedi,

naho hikuhuwilisa weye du.

2 Unihime miye weye Zumbe Mnungu na kunigeza,

uupelembe umoyo wangu na ubala wangu.

3 Lukunde lwako lunilongoela,

naho uhuwilwa wako wanilongoza mazuwa yose.

4 Miye hikale na want'hu walulimi,

hegu kunda hamwenga na watondwe.

5 Naihiya mdugano wa waihi,

nawanyilika wakutenda wavu.

6 Nahaka mikono yangu kulagisa hina masa,

naita hagihi ne kilingo chako weye Zumbe Mnungu,

7 vileke ninule izwi halava nt'hogola,

nakusimwiila yakweheela ayo udamanye.

8 Naiungisa inyumba yako weye Zumbe Mnungu,

aho wili ukulu wako.

9 Use kuusa ugima wangu hamwenga na wata waihile,

hegu kunikoma na wakomi.

10 awo wakudamanya yaihile lupisi lwose,

awo wakukeika lumwe kuhokela matundu ya soni.

11 Mna miye nenidamanye yakukwelela,

unionela mbazi na kunikombola.

12 Miye hikimala hant'hu hwamilwa,

nenimtogole Zumbe Mnungu mwo mdugano wa want'hu wakwe.