1 Weye Zumbe Mnungu, miye nenikeme mbuli yo lukunde lwako lukulu holukusila,

nenibilikize uhuwilwa wako mazuwa yose.

2 Nabilikiza kugamba, lukunde lwako lukulu lwekala mazuwa yose.

uhuwilwa wako lutoga enga ulanga.

3 Nokugamba, "Hiika ndagano na mnt'hu ywangu nimsagule;

hiika kilapi kwa mndima ywangu Daudi.

4 ‘Mazuwa yose nenimwiike mwelekwa ywako kunda seuta,

neniutende useuta wako unde wa mazuwa yose.’"

5 Mbingu zitogole mbuli zako za kweheela ukudamanya,

want'hu wakukile wakeme nt'hunyo zako weye Zumbe Mnungu.

6 Uko kwe mbingu, ni ani akudaha kuliganyizwa na weye Zumbe Mnungu?

Ni ani enga weye mwe viumbwa vose va kwe mbingu?

7 Mnungu wogoheswa mwe kitala cha wakukile.

watisa kujink'ha wose wakukuzunguluka.

8 Hahali mdahi enga weye Zumbe Mnungu ywo udahi,

weye Zumbe Mnungu, ywi mhuwilwa mwa yose.

9 Weye wekaila bahali ina mjubwaniso,

mazi yakwe yakajubwanika weye wayatondowaza.

10 Weye wamntigint'haga Lahabu niyo anda enga kakomigwa,

niyo wawamwaganisa wank'hondo wako

kwa mkono wako una ludole.

11 Mbingu na si vose vako,

ni weye waumbaga si na vose vimndani mwakwe.

12 Waumbaga uko kusini na kasikazini,

mnima Taboli na Helimoni wadionela kinyemi dizina dyako.

13 Weye ni mdahi

ludole lwako lukulisa.

14 Uwagilwa no usengelo niyo ink'hongelo yo useuta wako

lukunde no uhuwilwa wako vakelagisa mwo udamanyi wako wose.

15 Wana kinyemi wadya wakukuvika kwa kukema,

wakwikala mwo ung'azi wo undiilo wako.

16 Wangila dizina dyako msi wose,

kwa uwagilwa wako want'hu watunywa.

17 Kwaviya weye ni ung'azi na ludole lwawe,

naho kwo uwedi wako kulung'aza ludole lwetu.

18 Kwaviya nk'hindo yetu ni ya Zumbe Mnungu,

uyo akukile ywa Izilaeli heena miyawe ni Zumbe Mnungu ywetu.

19 Aho kale walongaga na wandima wako wahuwilwa kwa sila ya maona ukagamba,

"Himwink'ha ludole mtowani yumwenga mdahi,

hink'hiza ukulu kwa uyo nimsagule kulawa mwa want'hu.

20 Himwink'ha useuta mndima ywangu Daudi,

himwink'ha mwo undima kwa kumkumba mavuta yakukile.

21 Mkono wangu noumtozeleze mazuwa yose,

udahi wangu noumtende atoge.

22 Wank'hondo wakwe hawamdahe,

waihi hawadahe kumhuma."

23 Miye neniwahonde wank'hondo wakwe,

neniwakome wose wakumwiihiya.

24 Lukunde lwangu no uhuwilwa wangu nevinde kwakwe,

kwa zina dyangu naapate uhumi mkulu.

25 Useuta wakwe neniukuze,

kulawa kwe bahali mpaka kwe mito.

26 Naye naanitange akanigamba,

Ni weye Tate Mnungu ywangu,

ni weye mwamizi myokozi ywangu.

27 Naho nenimtende ande nt'hula sasu ywangu,

akulise kujink'ha maseuta wose mwe si yose.

28 Lukunde lwangu kwakwe nolugendeelo mazuwa yose,

ndagano yangu na yehe neitoge.

29 Nenikigendeze cheleko chakwe mazuwa yose,

useuta wakwe enga mbingu heziikusila.

30 "Mna uneva welekwa wakwe wanaileka imiko yangu,

hawanekale viligane ne zisigilizi zangu,

31 wanabananga imiko yangu,

niyo waleka kutimila iyo huunga,

32 neniwasulumize kwajili yo wavu wawe,

na kuwatowa kwa maihi wadamanye,

33 mna henileke kumuunga Daudi,

naho heniuse lagano dyangu kwakwe.

34 Miye henibanange ndagano yangu,

henihitule yadya nilongile.

35 Hikelisa lumwenga du kwa kukuka kwangu,

naho henimdant'hilize Daudi.

36 Welekwa wakwe hawande na uheelo,

useuta wakwe kwangu nounde enga zuwa,

37 nounde wa mazuwa yose enga mnenge,

mlonga uwona uhuwilwa mwo ulanga."

38 Mna haluse weye Mnungu kumlemela na kumduula,

kumwiihiya uyo umsagule.

39 Kwiihizwa hamwenga ne ndagano yo mndima ywako,

kuigela usavu nk'hofia yakwe ye kiseuta na kuiduula hasi.

40 Kumola zink'handula zakwe zose,

magomela yakwe kuyatenda mahame.

41 Wose wakumwombokela hagihi wauguhaga ugoli wakwe,

kanda ni ywa kubeligwa ni wambuyaze.

42 Wank'hondo wakwe kuwenk'ha uhumi,

wadya wakumsulumiza kuwenk'ha kinyemi.

43 Ikindedi, ukutwa kwe sime yakwe kukutenda fifigu,

naho humwambize mwe nk'hondo.

44 Kuuheleza udahi wakwe

kumhoka useuta wakwe.

45 Kumtenda asunguze kudalahala,

naho niyo wamgela uhuza.

46 Weye Zumbe Mnungu, neukefise mazuwa yose?

Maya yako nayakwele enga moto mpaka ini?

47 We Zumbe Mnungu, ukumbukile wikazi wangu ivo wili mguhi,

ni kihi kilekile mnt'hu akaumbwa!.

48 Ni mnt'hu ywani neekale haheina kubanika?

Naho ni ani akudaha kunyilika mwe kikuta?

49 Zumbe, lwikuhi haluse lukunde lwako ludya lwa nk'hongo holukusila,

ludya wamwiikilaga kilapi kwa uhuwilwa uyo mndima ywako Daudi?

50 Zumbe Mnungu, kumbukila ivo mdima ywako akuhomolwa,

ivo hufinyiliza ukulongwa vihile ni want'hu hewekumanyize.

51 Wank'hondo wako wanimtendela lubezo mndima ywako umsagule,

wamsimanga kila aho akuita.

52 Atunywe Zumbe Mnungu, mazuwa yose!

Taile! Taile!