1 Enga swala ikuunga mazi mwe kazuto,

nivo hukuungisa Zumbe Mnungu ywangu.

2 Naona nk'hilu ya Mnungu, Mnungu mta udahi,

nenibule ini na kuiona futa yakwe?

3 Masozi yanda nk'hande yangu msi na kilo,

umwo wakanigamba, "Ekuhi Mnungu ywako?"

4 Nakumbukila naho mbuli izi,

kwa usungu mwo moyo wangu,

enga ivo niitile na fyo kulu idi dya want'hu,

na kuwalongoza kwe nyumba ya Mnungu,

wakatoa nk'helegele zo uwedi,

na fyo dya want'hu niyo wadamanya zuwa dye kinyemi.

5 Nii nanda na kinyulu mwo moyo wangu?

Nii naho naangadika mwo moyo wangu?

Namhuwila Mnungu, naho nenimtunye naho,

yehe niye wambizi wangu na Mnungu ywangu.

6 Hinda na kinyulu mwo moyo wangu,

ivo nakukumbukila weye Mnungu ywangu,

Kulawa Yolodani,

na kulawa mwo mnima wa Helimoni na Mizali.

7 Mto una mwina uujink'ha mtuhu,neva izwi dya lubant'ha lwa mazi

mjubwaniso wako na malao yako yanididimiza.

8 Zumbe Mnungu naanilagise lukunde lwakwe nomsi,

miye name nenimkimele ukemi wa nt'hogola aho nekilo,

na kumlombeza Mnungu anink'he ugima.

9 Namgamba Mnungu mdahi ywangu,

"Nii kunijala?

Nii niite uko na uko hahongeza,

kwa kuhujilwa na wank'hondo wangu?"

10 Hihomoleswa,

umwo wakaniuza kila zuwa,

"Ehahi Mnungu ywako?"

11 Nii nenda na kinyulu mwo moyo?

Nii naho naangadika mwo moyo wangu?

Namhuwila Mnungu,

kwaviya nenimtunye Mnungu naho,

yehe niye wambizi wangu na Mnungu ywangu.