1 Ukitegeleze weye mdimi ywa Izilaeli,

weye ukumlongoza Yusufu enga fyo dya ngoto,

uking'azile weye wikale mwe viumbwa vina mawawa vikwitangwa makelubi,

2 mwa makabila ya Ifulaimu, Benjamini na Manase,

lwinule ludole lwako,

wize ukiyokole.

3 Weye Mnungu, ukivuze,

ukikaule kwa mbazi zako,

naswe nekiyokolwe.

4 Weye Zumbe Mnungu,

nouheleze ini kufiila maya want'hu wako wakukulombeza?

5 Kukink'ha ludyo lwa kinyulu,

kukinywesa masozi yamemile mwe kiyamp'ha.

6 Kinda wank'hondo kwa wadya wakizunguluke,

waihi wetu wakitendela ubezo.

7 Ukivuze weye Mnungu mta ludole,

kionele mbazi naswe nekiyokolwe.

8 Kuuleta mzabibu kulawa Misili,

kuwagulusa want'hu wa si nt'huhu,

kuuhanda woho mwe isi.

9 Wauhaiilaga vileke ukule,

nawo wengizaga maizi niye wenela mwe isi yose.

10 Kizuli chakwe chagubikaga milima,

niyo matambi yakwe yaigubika mielezi mikulu.

11 Matambi yakwe yageendelaga mpaka kwe bahali,

masukiza yakwe nayo mpaka kwo mto Eufulate.

12 Haluse nii ukalumola lukazi lwakwe,

vikuleka kila akombokela aho anonola zizabibu zakwe?

13 Nguluwe za kwe mbago zaukochola

naho makala ya kwe nyika yapata ludyo.

14 Kiuiye weye Mnungu mta udahi wose,

hake ukaule kulawa kwe mbingu vileke,

uudime mzabibu uno,

15 ni mti uuhandile kwa mkono wako wo kulume,

mwana umleile kwajili yako mwenye.

16 Waukant'ha na kuutimp'ha moto,

wakaule kwa maya yako.

uwabanange pele.

17 Mkono wako umwamile mnt'hu umsagule,

mwana mnt'hu umuumbile kwajili yako mwenye.

18 Hake kileke naho,

kink'he ugima suwe kikuvike.

19 Weye Zumbe Mnungu ywo udahi wose, ukivuze,

kionele mbazi naswe nekiyokolwe.