1 Mnungu suwe kiva suwe wenye,

wakale wetu wakisimuila,

mbuli izo udamanye uko kale.

2 Kwa udahi wako mwenye wawagulusaga want'hu wa si nt'uhu,

na hant'hu hawe niyo wawaika want'hu wako,

naho wawasengelaga want'hu awo,

na kuwatenda want'hu wako wagenyele

3 Want'hu wako hawaitahile isi kwa vitoanilo vawe,

hegu hawapataga uhumi kwa ludole lwawe,

mna ni kwa ludole na udahi kwa uwedi wako,

kwaviya weye wawaungisaga.

4 Weye niwe seuta ywangu na Mnungu ywangu,

wawatendaga welekwa wa Yakobo wande wahumi.

5 Kwa udahi wako chawahuma wank'hondo wetu,

kwa zina dyako chawajata wakukibela.

6 Miye hikuhuwila uta wangu

hegu sime iniyokole,

7 mna ni weye ukiyokole mwa wank'hondo wetu,

wawagelaga soni wadya wakukiihiya.

8 Mazuwa yose nekikutumye Zumbe Mnungu,

naho nekikutogole mazuwa yose.

9 Mna wakilekaga niyo chahumwa,

hwi hamwenga na watowani wetu naho.

10 Kukitenda kiwanyilike wank'hondo wetu,

woho nawo niyo wataha ugoli wetu.

11 Kukitenda enga ngoto zikuita kwo kuchinjwa,

niyo chasambala mwe ziisi zint'huhu.

12 Kuwataga want'hu wako kwa yombe dodo,

huungile kuuza diyombe dyakwe.

13 Kukitenda kibeligwe ni want'hu wa hagihi,

wakizunguke kwe mihaka yetu wakiseka.

14 Kukitenda kibeligwe na na si nt'huhu,

watakwiza wakibela na kukiona hi kint'hu.

15 Msi wose wanibela du,

futa yangu nayo ingila soni,

16 kwa milosi na mabelo yawe ya kunihomola,

na kunda hagihi na wank'hondo na wakuniihiya.

17 Ayo yose yakibwiila suwe,

enga viya hakikujaile

hegu kubananga ndagano yako.

18 Hakikulekile weye,

hegu kuleka sila zako.

19 Mna ivo kukileka mwa makala yaihile,

naho kukileka mwe diziza ditendese.

20 Uneva chakujaile weye Mnungu ywetu,

na kuvika milungu yo udant'hi,

21 Zumbe Mnungu kumanya kale mbuli ino,

kwaviya weye wazimanya fanyanyi zangu.

22 Kwaviya kihagihi no kubanika kwajili yako,

chadamanyilwa enga ngoto zikwigalwa kwo kuchinjwa.

23 Inuka Zumbe! Nii kugona?

Setuka sema unakiduule mazuwa yose.

24 Nii wakefisa hale na suwe?

na kujala makunt'ho na masulumizo yetu?

25 Kigwa hasi mwe sanga,

kigwa kifulifuli mwo luvumbi.

26 Winuke wize uchambize,

ukikombole kwa lukunde lwako.