1 Mnungu ande kulanga, wank'hondo wakwe wamwaganike,

wose hewekumuunga wamnyilike.

2 Enga mosi ivo ukuhumunt'hwa ni mp'heho,

nivo nawo wakuhumunt'wa,

enga ivo nt'ha ikulujuka ho moto, nivo waihi nawande ho undiilo wa Mnungu.

3 Mna wawagilwa, nawande na kinyemi ha Mnungu,

wana kinyemi na kwanga.

4 Mkemeleni Mnungu, ditogoleni dizina dyakwe

mdamanyileni sila yakwe uyo ekulanga kwa mavunde.

Zina dyakwe niye Zumbe Mnungu, indeni na kinyemi ho undiilo wakwe.

5 Mnungu emwe nyumba yakwe ikukile,

niye tati yawe ywa wana nk'hiwa, naho mwamizi ywa wabanikilwe ni wagosi zawe.

6 Heweina ndugu, Mnungu awenk'ha kaya ikutoga,

awalekela wavugailwa na kuwenk'ha upati,

mna wasaguke nawekale mwe isi ibabaluke.

7 We Mnungu, umwo wawalongoele want'hu wako,

umwo wandile ukomboka mwe dijangwa,

8 isi yasingisikaga niyo ulanga wanya fula,

kwajili yo undiilo wako weye Mnungu ywa Sinai,

heiye, mwo kwiza kwako weye Mnungu ywa Izilaeli.

9 Weye Mnungu, watendaga fula inyelese mwe isi,

waivuzaga uhya isi yako iyo yanyalaga.

10 Niyo want'hu wako wapata kaya aaho,

wawenk'haga wakiwa yadya waungaga.

11 Zumbe Mnungu alavaga sigilizi,

niyo wavele wabindile wingi waubwelekeza ulosi uwo.

12 Maseuta na wata mafyo ya watowani wawe wanyilikaga.

Wavele mwe kaya wakepangilaga vitahigwa,

13 Hata ukagona mgatigati ye mimoto ya he nk'hambi,

mawawa ye suwa yangu yakizigwa kwa masawa,

mazoya yakwe nayo kwa zahabu ikun'gala.

14 Umwo Zumbe Mnungu awa mwaganisaga maseuta mwe isi,

ni enga seluji igwele mwo mnima wa Salimoni.

15 Weye mnima mtali wa Mnungu, mnima wa Bashani, mnima una vinenengwa vingi,

16 nii unafinju no mnima,

mnima usagulwe ni Mnungu mwenye vileke ekale uumo?

Zumbe Mnungu neekale uuko mazuwa yose.

17 Akanda ne dikulajunga dikuile

maalufu na maalufu na maalufu ya magali yakugendezwa ni falasi,

Zumbe Mnungu eza kulawa Sinai, eza hant'hu hakwe hakukile.

18 Kakwelesa kulanga

kataha watahigwa, ahokela mageleko kulawa kwa want'hu,

kulawa hata kwa want'hu wasaguke.

Zumbe Mnungu neekale uuko.

19 Atunyigwe Mnungu mazuwa yose,

yehe akuguha zint'wika zetu mazuwa yose.

Niye Mnungu akukiyokola.

20 Mnungu ywetu ni Mnungu akuyokola,

kwakwe yehe nuko kwili zisila,

zisila zo kuinyilika ifile.

21 Ikindedi Mnungu naaihonde mitwi ya wank'hondo wakwe

wose wadya wakugendeela mwo wavu wawe.

22 Zumbe Mnungu agambaga, "Neniwavuze wank'hondo kulawa Bashani,

neniwavuze kulawa kwe minyongomela ye bahali,

23 vileke usunt'he iviga mwe sakame ya wank'hondo wako,

uku makuli yako nayadye zinyama zawe."

24 We Mnungu, makulajunga yako ya uhumi yaonwa ni wose,

makulajunga ya Mnungu, seuta ywangu mpaka hakukile hakwe.

25 Wakemi walongola, wakutimila watowa makopo,

wana kike we hagati wakatowa vigoma.

26 "Mtunyeni Mnungu mwo mdugano mkulu wa want'hu,

nyuwe mdugano wa Yakobo mtunyeni Zumbe!"

27 Nk'hongo ni Benjamini, dikabila didodo mwa yose,

akatimilwa ni vilongozi wa Yuda ne difyo dyawe,

wakatimilwa ni vilongozi wa Zabuloni na Nafutali.

28 We Mnungu, kilagise udahi wako,

kik'he ludole lwako enga ivo watendile hadya nk'hongo,

29 kulawa kwe Nyumba yako uko Yelusalemu,

uko maseuta nawakwizile na mageleko yawe.

30 Mfank'hile dikala mbago dikwikala mwe nyasi,

fyo dya majeku na ndama za want'hu,

vileke wename hasi na kukulavila masawa yawe.

Wamwaganise wose wakuungisa nk'hondo.

31 Wegala ulosi naweze kulawa Misili,

Waesiopia nawenule mikono yawe kulanga wakamlombeza Mnungu.

32 Mkemeleni Mnungu nyuwe useuta wa mwe si zose,

mkemeleni nt'hunyo uyu Zumbe Mnungu,

33 mkemeleni yehe akomboka mwe mbingu,

kukongela aho kale,

mtegelezeni akabuma kwa mtindilo.

34 Bwelekezeni udahi wa Mnungu,

yehe ni Zumbe mwe Izilaeli,

uyo udahi wakwe ukwe mbingu.

35 Mnungu atisisa aho hakukile hakwe

yehe ni Mnungu ywa Izilaeli,

enk'hiza udahi na ludole kwa want'hu wakwe.

Nt'hunyo ni za Mnungu!