1 Mtunyeni Zumbe Mnungu kulawa kwe mbingu,

mtunyeni yehe kulawa kwe mbingu!

2 Mtunyeni watumigwa wakwe wa kwe mbingu wose,

mafyo dyakwe dyose dya kwe mbingu mwink'heni nt'hunyo.

3 Mtunyeni yehe nyuwe zuwa no mnenge,

mwink'heni nt'hunyo, nyuwe zint'hondo zose mkwalika.

4 Mtunyeni yehe nyuwe mbingu mwi kulanga vitendese,

nanywe mazi mwi kulanga ye mbingu .

5 Vose viditunye dizina dya Zumbe Mnungu,

kwa viya voho vaumbwagwa kwa ulosi wakwe,

6 aviikaga kila kimwenga hant'hu hakwe mazuwa yose,

alavaga sigilizi heikuhitulwa mazuwa yose,

7 mkulawa mwe si, mtunyeni Zumbe Mnungu,

nyuwe viumbwa vikulu va mwe bahali,

hamwenga ne mina yose ye bahali,

8 lumwemwe na fula ya maiwe na balafu na mavunde,

nk'hung'unt'ho na mjubwaniso ivo vikumwiva akalonga,

9 milima na vigulu vose,

maziti ya matunda na matuhu yakwitangwa mielezi,

10 makala mbago na mifugwa,

viumbwa vidodo hamwenga na madege ulanga,

11 maseuta wa si na want'hu wose,

wakulu hamwenga na walamuzi wa si,

12 wabwanga na wandele,

wakulu na wana wadodo.

13 Awo wose waditunye dizina dya Zumbe Mnungu,

kwaviya dizina dyakwe yehe ekedu dikulisa kujink'ha mazina yose,

ukulu wakwe wi kulanga kujink'ha si ne mbingu.

14 Kawenk'ha want'hu wakwe ludole,

nt'hunyo kwa wahuwilwa wakwe wose,

kwajili ya want'hu wa Izilaeli we hagihi naye.

Mtunyeni Zumbe Mnungu.