1 Mkemeleni Mnungu ywo ludole lwetu,

kemeni mila ya nt'hogola Mungu ywa Yakobo.

2 Ukongeni uwila mkatowa malimba,

toweni zeze na kinubi kwa izwi dyedi.

3 Toweni magunda ya mp'hembe ze zingoto mwe dizuwa dya kinyemi,

dyo kufosa mnenge na mwo mnenge ukint'hile,

4 ivi nivo kili kihendo kwa Izilaeli,

sigilizi ya Mnungu ywa Yakobo.

5 Awenk'haga malagizo Waizilaeli

umwo aitowaga isi ya Misili.

6 "Miye namtulaga zint'wika zako mwa maega yakwe,

mikono yakwe niyo yanda hainule nt'hangulu izamile.

7 Wanitanga niyo nakuyokola umwo wandaga na makunt'ho,

nakwitikaga kwa kutint'hila kulawa kwo ufiso wangu.

Miye nawagezagani kudya kwa mazi ya Meliba. 8 Nitegelezeni,nyuwe want'hu wangu, miye namikanyani

Hegu nevinda vedi mwanitegeleze Waizilaeli!

9 Kusekunda na mnungu mtakwiza kwenyu,

usekumvika mnungu mtuhu.

10 Ni miye Mnungu ywako

uyo akulavile kulawa Misili,

wasame mnomo wako name nohwank'hize.

11 Mna want'hu wangu hawanitegeleze,

Izilaeli hawaungile kuniva.

12 Elo hiwaleka wagendeele ne zink'hani zawe,

watimile zifanyanyi zawe.

13 Nevinda vedi want'hu wangu wanitegeleze,

naho viwagilwa wanitimile yadya huunga,

14 hegu nehisunguza kuwatowa wank'hondo wawe,

naho udahi wangu hegu nouwahiga awo wakuwasulumiza.

15 Naho wose wakumwiihiya Zumbe nawengile kinyulu wakadugana,

masulumizo yawe ya mazuwa yose.

16 Mna nyuwe Izilaeli nehiwenk'hani ludyo lwa ngano yedi,

na kuwegusani na uki ukulawa mwe mp'hanga ya luwe."