1 Mnungu usekuleka kunitegeleza,

unive kwa kiya hukulombeza.

2 Nitegeleze niyo wanihitula,

Fanyanyi zangu zingila kiyangayanga.

3 Nawogoha wank'hondo wangu ivo wakunitisa,

na kwa kuhujilwa ni want'hu waihile,

want'hu awo wanigela nk'huswank'huswa,

wana maya na miye naho hawakuniunga.

4 Moyo wangu una kinyulu,

naho una wogohi wa kukomwa.

5 Nna wogohi na kizingizo,

naho lukeng'ent'ha lwinizila.

6 Vilekile hagamba, Vandile nna mawawa enga suwa,

hegu nehipulukila hale niyo nahumula uuko.

7 Hegu naitile hale,

naho hegu nazengile kaya yangu kwe dijangwa.

8 Hegu nehisunguza kuita hekwiina makunt'ho,

hale no mjubwaniso na nk'hung'unt'ho.

9 Zumbe, wazaganye wank'hondo wangu, naho watende wase kuivana mwe milosi yawe,

kwaviya naona ukwank'walu na nk'humbizi mwo mzi,

10 kilo na msi wazunguluka zink'handula zakwe,

wiihi na nyambi zimndani mwawe.

11 Kubananga, kwenela kila hant'hu mwo mzi,

kuhujila na nyambi havikuhalawa mwe zisila zakwe.

12 Andile mnk'hondo ywangu anihomole,

hegu nehifinyiliza,

vandile want'hu waihi nawakanitendela lubezo,

hegu nehiwanyilika.

13 Mna kumbe ni weye miyangu

mbuyangu ywa hagihi kimanyane,

14 uyo nekikaonela kwa hamwenga kinyemi cho umbuya wetu,

na kuvika hamwenga mwe Nyumba ya Mnungu.

15 File iweziile kipump'ha,

nawaseele hasi kwe isi ya wabanike!

kwaviya wiihi umwe zikaya zawe na wamwenga mwa woho.

16 Mna miye namlombeza Mnungu

naho Zumbe naaniyokole.

17 Mtondo na nomsi na nekilo, naila kwa kusulumila,

yehe naye naanive.

18 Naaniyokole haheina kulumizwa,

kulawa mwe nk'hondo hutowana,

kwaviya nahigana na wank'hondo wengi.

19 Mnungu, uyo akwikaila si yose mazuwa yose heekuhituka,

naaweve na kuwahitula,

kwaviya hawakuunga kuuleka uwihi wawe,

naho hawakumwogoha yehe.

20 Uyu miyangu awatowa wambuyaze,

kaibananga indagano aikile.

21 Simulizi zakwe ni enga mabongo

mna zifanyanyi zakwe zaika mizungu ya nk'hondo,

ana milosi enga mavuta,

mna yasenga enga sime ikutwelesa.

22 Mwasile Zumbe Mnungu akudime,

yehe naande mwigamo wako

heize ilaile amwase mhuwilwa ywakwe ahumwe.

23 Mna, weye Mnungu, wakomi wose na wadant'hi nouwegale

kwa mabome yo kuwoela,

umwo inusu yo wikazi wawe ukanda ukei kusila.

Mna miye, nakuhuwila weye Mnungu.