1 Nakutogola weye Zumbe Mnungu,

kwaviya kuniyokola,

huwalekele wank'hondo wangu wasekukeduvya kwangu.

2 Nalombezaga wambizi kwako weye Zumbe Mnungu,

niyo nawe wanihonya.

3 Weye nokuniyokola,

nokunikombola kulawa kwe isi ya wabanike,

niyo wanink'ha naho ugima.

4 Mkemeleni Zumbe Mnungu mila ya kumtunya,

nyuwe wahuwilwa wakwe!

Kumbukileni kiya adamanye uyo akukile,

niyo mwamwink'ha nt'hogola.

5 Maya yakwe ni ya lupisi luguhi du,

mna zimbazi zakwe ni za mazuwa yose,

ndilo yeza hata nekilo,

mna kinyemi cheza nomtondo.

6 Name nize nione ni mpati nagambaga,

"Henihumwe naho."

7 Kwo uwedi wako Zumbe Mnungu,

wautendaga useuta wangu enga mnima houkusingisika.

Mna wize ukefise,

miye nengilaga kinyulu.

8 Nehikuiila weye Zumbe Mnungu,

niyo namlombeza Zumbe Mnungu anambize.

9 "Nikihi noupate uneva nna banika?

Upati wako nounde ni uhi uneva nnaita kwe isi ya wabanike?

Wabanike nawadahe kukwink'ha nt'hogola?

Awo nawadahe kubilikiza uwedi wako?

10 Zumbe Mnungu, nitegeleze naho unionele mbazi.

Nambize weye Zumbe Mnungu!"

11 Nokuyahitula mahongezi yangu kunda kinyemi,

nokunihambula suke za magunia,

na kunivala luseko.

12 Miye heninyamale,

nohukemele mila ya kukutogola,

weye Zumbe Mnungu nohutogole mazuwa yose.