1 Nagambaga, "Nenidime wikazi wangu,

sema nnadamanye wavu kwa milongele yangu,

neninyamale umwo waihi wangu wakanda hagihi na miye."

2 Mna umwo nanyamalaga enga kimumu,

haheina kulonga dyodyose dyedi,

makunt'ho yangu yatendesaga kunda madala,

3 kwangadika kwangu nalumilaga mwo moyo wangu,

umwo nafanyanyaga nivo naangadikaga

niyo mbuli izi zanilawa.

4 "Zumbe Mnungu ywangu unigambile uheelo wo wikazi wangu,

mazuwa yangu yo kwikala mwe isi yasigala mengahi?

Vileke nimanye ivo yakusunguza komboka."

5 Kaula kunihimila wikazi mgihi vitendese,

wikazi wangu hiyo kint'hu hako,

kindedi kila mnt'hu ni enga muye du.

6 Kindedi kila mnt'hu omboka enga kizuli,

kukombeka kwake kose hiyo kint'hu,

aduganya ugoli haheina kumanya niani naapate.

7 Haluse Zumbe ni kihi hukawiila?

Kawiilo dyangu di kwako weye.

8 Uniyokole mwo wiihi wangu wose,

usekuzumila wahezi wanibele.

9 Hinyamala enga kimumu,

kwaviya weye ni weye udamanye ayo.

10 Usekunisulumiza naho,

nabindilikila kwa masulumizo yako.

11 Umwo ukamsengela mnt'hu kwa wavu wakwe kwa kumkanya,

wahausa uwedi enga mswa,

kindedi kila mnt'hu ni enga muye du.

12 Wive malombezo yangu Zumbe Mnungu

wive ndilo yangu,

wive ivo huila.

Kwaviya miye ni enga mta kwiza du akomboka,

ni mtafi enga wadala wetu wose ivo wandaga.

13 Nilekele nisangaale mwa meso,

umwo hinati kubanika na kulawa mwe isi.