1 Wahezi wakelongela mwo moyo,

kugamba Mnungu hakuli,

wose waganika vitendese,

wadamanya mbuli za kwiihiza,

hehali hata yumwenga adamanye yedi.

2 Zumbe Mnungu awakaulisa want'hu kulawa kwe mbingu,

akaule uneva naone hata yumwenga mbala,

uneva kuna yeyose akumzungula Mnungu.

3 Mna wose wana malema naho waganika,

hehali akudamanya ayedi,

hehali hata yumwenga.

4 "Togola awo wakudamanya yaihile hawamanyize?

Wawabwant'ha want'hu wangu enga mikate,

naho hawakunitunya miye Zumbe Mnungu."

5 Mna nawande na wogofi mkulu,

kwaviya Mnungu ehamwenga na want'hu wakumwiva.

6 Wadaha kwazaganya mizungu ya mnt'hu mkiwa,

mna Zumbe Mnungu niye unyilikilo wakwe.

7 Wandile uyokozi wa Izilaeli wezile kulawa Sayuni,

Zumbe Mnungu umwo akadamanya uhya wikazi wa want'hu wakwe.

Welekwa wa Yakobo nawange,

naho Waizilaeli nawande na kinyemi.