1 Zumbe Mnungu mdahi kalonga niyo

aduganya want'hu wa si yose usweelo mpaka ulailo wa zuwa.

2 Mnungu ang'aza kulawa Sayuni,

mzi ukint'hile kwa utana.

3 Mnungu ywetu eza haheina kunyamala,

moto ukoka tiki ukulongole kwakwe,

kazungulukwa ni nk'hung'unt'ho nk'hulu.

4 Azitanga zimbingu na si zinde waona,

zikaule umwo akawasengela want'hu wakwe.

5 Agamba, "Niduganyileni wahuwilwa wangu,

wadya waikile ndagano na miye kwa kulava nt'hambiko."

6 Mbingu nazo zabilikiza uwagilwa wakwe,

Mnungu mwenye niye mlamuzi.

7 Nyuwe want'hu wangu tegelezeni, name neni longe,

neni walongelezeni nyuwe Izilaeli,

ni miye Mnungu, Mnungu ywenyu.

8 Hikukufank'hila kwajili ye zint'hambiko zako,

na malavo yako yo kokwa pele ukunilavila mazua yose.

9 Hiyo kugamba naunga majeku yemwe didewa dyako,

hegu mbuzi za mwo mngo wako,

10 kwaviya makala yose mwe mabago, yangu miye,

ne zing'ombe mwe milima maalufu, mwenye ni miye.

11 Madege ulanga yose, nayamanya,

naho viumbwa vose vimwe si, mwenye ni miye.

12 "Uneva nandile na sala hegu hehakugambila,

kwaviya si na vose vimemile umwo, vangu miye.

13 Ivo miye ni ywa kudya nyama ya majeku,

hegu kunywa sakame ya mbuzi?

14 Mlavile Mnungu malavo ya nt'hogola,

naho ukint'hize kiya ukelisile kumdamanyila yehe ekulanga vitendese.

15 Ukanitange mwe dizuwa dya makunt'ho,

name nohuyokole,

nawe nounitunye."

16 Mna Mnungu amgamba mnt'hu mwavu ivi,

"Una uwagilwa wani kubilikiza zisigilizi zangu?

Naho wasimwiila vivihi indagano yangu?

17 Kwaviya wayaihiya mahinizo yangu,

na kuyallemela makanyo yangu.

18 Ukamuona mbavi wanda mbuya naye,

mhabwasi naye watimilana naye.

19 Mnomo wako ni wa milosi iihile du,

lulimi nalo ni lwa kutula nyambi.

20 Kwikala lumwe kwa kuwateta wanduguzo,

na kuwaziga wadya, mwelekanywe mamiyenyu yumwenga."

21 Kuyadamanya aya yose mna miye hinyamala,

weye wagamba miye ni enga weye,

mna haluse nohufank'hile,

na kukulongeleza iivi ukakaula.

22 "Myafanyanye ayo nyuwe mkumjala Mnungu,

Cheivo naawalwebuleni vilebetulebetu,

naho hokunde na ywa kuwayokolani.

23 Akunilavila malavo ya nt'hogola niye akunogoha,

uyo akeikila lumwe sila vileke nimlagise uyokozi wa Mnungu."