1 Mwive nyuwe nyose,

mtegeleze nyose mkwikala mwe si ino,

2 wata nt'hogola na wadya wabeligwe,

wagoli na wakiwa hamwenga.

3 Nenilonge mbuli za mizungu,

fanyanyi zo moyo wangu zegala ukombaganyi.

4 Nenitegelezese milosi ye zingelo,

no kufyambula lusimo umwo hatowa dizeze.

5 Miye henogohe mwa mazua yo wiihi,

umwo hatemangizwa ni wiihi wa wank'hondo,

6 awo wakukawiila viya wananavo,

no kukedivila ugoli wawe.

7 Hahali mnt'hu yeyose akudaha kukombola wikazi wa miyawe,

hegu akudaha kulava maliho ya kugula ugima wakwe kwa Mnungu,

8 kwaviya maliho yo ugima wetu yakulisa,

naho hahana maliho yoyose nayakint'he,

9 vileke yakitende kikale mazuwa yose

naho asekubanika.

10 Kwaviya wose waona kugamba, hata wata mizungu wabanika,

wahezi na wabwalasi wose wabwiilwa ni file,

no kuwasa ugoli wawe kwa want'hu watuhu.

11 Vikuta nizo zikaya zawe mazuwa yose,

nawekale uumwo lupisi lwose,

hamwenga na kugamba wandaga na nk'honde zawe wenye.

12 Hamwenga no kutogolwa kwakwe, mnt'hu haakehonye ne file,

yehe naye naabanike enga viumbwa vituhu.

13 Nuwo uheelo wa wose wahezi wakukeduvila ugoli wawe,

na wadya wakuwatimila na kuzumila yadya wakulonga,

14 Nawolongozwe enga ngoto kuita kwo kubanika,

ifile neinde nuyo mdimi ywawe,

nawajatangizwe ni wawagilwa wa Zumbe.

vimba vawe neviole,

kwe isi ya wabanike hale ne zikaya zawe.

15 Mna Mnungu naanikombole kulawa mwo udahi we file.

Mna ikindedi yehe naaniyokole no ludole lwo kubanika.

16 Usekuona kinyulu mnt'hu akanda mgoli,

akandilisa na vint'hu vingi,

17 kwaviya mwo kubanika kwakwe,

ugoli wakwe haaite nawo kwe kikuta.

18 Hata uneva mnt'hu mwo ugima wakwe ana kila kint'hu,

na kutogoleswa kwajili yo upati wakwe,

19 naande hamwenga na wakale wakwe wamlongowele kubanika,

hawaone ung'azi mazuwa yose.

20 Mnt'hu mta ugoli heheina ubala,

nawabwiilwe ni file du enga viumbwa vituhu.