1 Mkemeleni Zumbe Mnungu wila mhya

Mkemeleni Zumbe Mnungu weye si yose.

2 Mkemeleni Zumbe Mnungu na kuditunya dizina dyakwe,

bwelekezeni uyokozi wakwe mazua yose.

3 Wabwelekezeni want'hu wa si, ukulu wakwe,

wagambileni want'hu wose zimbuli zakwe za kwehela.

4 Kwaviya Zumbe Mnungu ni mkulu, atogolweswa,

yehe ni ywa kwogoheswa kujink'ha milungu yose.

5 Kwaviya milungu ya si nt'huhu hiyo kint'hu,

mna Zumbe Mnungu niye adamanye zimbingu.

6 Ukulu na ung'azi vi ho undiilo wakwe,

udahi no uwedi vihakukile hakwe.

7 Want'hu wa si zose, mtogoleni Zumbe Mnungu,

utogoleni ukulu no udahi wakwe.

8 Mwink'heni Zumbe Mnungu ukulu we dizina dyakwe,

igaleni malavo mkengile mwe nyumba yakwe.

9 Mvikeni Zumbe Mnungu ho ung'azi wo ukulu wakwe,

want'hu wa si yose, zingizeni ho undiilo wakwe.

10 Wagambileni want'hu wa si yose, "Zumbe Mnungu niye seuta,

kaitenda si, itoge, haikudaha kusingisika.

Naawasengele want'hu wa si kwa uwagilwa."

11 Mbingu zinde na kinyemi, si nayo neyange.

Bahali ivumile na vose vimndani.

12 Nk'honde na kila kiyumo vange,

maziti yose yemndani yakeme kwa kinyemi,

13 viumbwa vose vinde na kinyemi ho undiilo wakwe kwaviya eza,

eza aisengele si.

Naaisengele si kwa uwagilwa

want'hu nawo mwe kindedi chakwe.