1 Mnungu, moyo wangu haukogoha,

nenikeme na kukutunya kwa moyo wangu wose.

2 Zeze na kinubi setukeni,

nenikusetule kutandazuka.

3 We, Zumbe Mnungu nohutogole mgati mwa want'hu,

nohukemele nt'hunyo mwa want'hu wa si.

4 Kwaviya lukunde lwako ni lukulu,

lukulisa mpaka kwe mbingu,

uhuwilwa wako hata kwo ulanga.

5 Mnungu utunywe uko kwe mbingu,

ukulu wako unde mwe si yose.

6 Kiyokole na kuchambiza kwa udahi wako mkulu,

vileke wose ukuwaunga wayokolwe.

7 Mnungu kalonga kulawa hakukile hakwe, "Neniipange Shekemu kwa kwanga,

kolongo dya Sukoti nenidihime vigemogemo.

8 Gileadi na Manase zose zangu,

Ifulaimu niyo ink'hofia yangu itogile,

Yuda naye niye ink'home ikulagisa useuta wangu.

9 Moabu ni lwiga lwangu lwa kuhakila,

neniiduile kilatu changu uko Edomu,

kulagisa kugamba nayo ni yangu

nenigute lukunga lwa uhumi uko Filisiti."

10 Niani naanigale kwo mzi una gomela?

niani naanilongoze kuita Edomu?

11 Weye kukileka lekeleke?

Hukuunga kuitanya na watowani watu?

12 Kink'he wambizi kiwahige wank'hondo wetu,

wambizi wa want'hu hicho kint'hu.

13 Kinandanya na Mnungu nekinde wahumi,

yehe naawajatangize wank'hondo wetu.