1 Nyuwe viumbwa va kwe mbingu mtunyeni Zumbe Mnungu,

mwink'heni nt'hogola itendese na udahi.

2 Mwink'heni nt'hogola itendese ye dizina dyakwe,

mvikeni Zumbe Mnungu hant'hu hakwe hakukile.

3 Izwi dya Zumbe Mnungu divika mwa mazi,

ung'azi utendese wa Mnungu utowa lukuwa,

ne diizwi dyakwe divika mnanga mwa mazi mengi.

4 Izwi dya Zumbe Mnungu dina udahi,

Izwi dya Zumbe Mnungu dikulisa.

5 Izwi dya Zumbe Mnungu dyavuna maziti yakwitangwa mielezi,

Zumbe Mnungu avuna maziti yakwitangwa mielezi ya Lebanoni.

6 Aitenda milima i Lebanoni ipilikepilike enga ndama,

naho aitenda milima ya Helimoni ijink'hejink'he enga njeku.

7 Izwi dya Zumbe dyalava ndilija za moto.

8 Izwi dya Zumbe Mnungu dyasingisa dijangwa,

Zumbe Mnungu atint'hila mwe dijangwa dya Kadeshi.

9 Izwi dya Zumbe Mnungu dyakungudisa mivule,

naho dyahulula mani mwa maziti,

mwe nyumba yakwe Zumbe Mnungu, wose nawalonge kwa izwi kulu, "Ung'azi utendese ni kwa Zumbe Mnungu!"

10 Zumbe Mnungu ekala mwa mazi mengi.

Yehe ni enga seuta ywa mazuwa yose.

11 Zumbe Mnungu awagela ludole want'hu wakwe,

naho awavikila kwa utondowazi.