1 Zumbe Mnungu ywangu nakugulukila weye.

Unikombole na kuniyokola kulawa kwa wose wakunitimila.

2 Sema akanimofola enga simba,

na kunibulumula haheina ywa kuniyokola.

3 Zumbe Mnungu ywangu!

Uneva hidamanya mbuli zimwenga mwa izi,

uneva higela usavu mwe mikono yangu,

4 uneva himtendela yeyose yaihile,

hegu himsezenga mbuyangu

hegu kumkump'hukila mnk'hondo ywangu haheina lema,

5 ivo mnk'hondo ywangu anikulumbuze na kunigwila,

ajatangize wikazi wangu

na kunikomela aaho.

6 Inuka Zumbe Mnungu kwa maya yako,

winule maya yako mwa wank'hondo wangu,

inuka Zumbe ywangu unambize,

weye kuutenda uwagilwa udamanyike.

7 Uwaduganye want'hu wose mnk'handa mwako,

weye nawe uwekaile kukongela kulanga.

8 Weye Zumbe Mnungu wasengela want'hu wose,

unigombele kulagisa kugamba hina masa,

viligane na uwedi wangu.

9 Uuheleze wiihi wa want'hu waihile,

want'hu wedi uwatende watoge.

Weye Zumbe muwagilwa,

umanyize zifanyanyi ze miyoyo ya want'hu.

10 Mnungu ni enga nk'hindo yangu,

yehe awayokola want'hu wata miyoyo yedi.

11 Mnungu ni mlamuzi ywa uwagilwa,

kila zuwa awasengela wakudamanya wiihi.

12 Want'hu hawanakeiile,

Mnungu naanole jambia yakwe

naahinde uta na kuwiika lumwe.

13 Aika lumwe vitoanilo vakwe,

na kuika vedi misale yakwe ikukweela moto.

14 Want'hu waihi wenula nda ya maihi,

wana ubovu wa makunt'ho,

wengila nyumba udant'hi.

15 Wasimba mabome na kuyafulikiza

niyo wahubugila woho wenye.

16 Ubanangi wawe nouwauiye woho weye,

wiihi wakwe nouwauiye wenye.

17 Nenimtunye Zumbe Mnungu kwaviya yehe ni ywedi.

Nenikeme nt'hogola kwa Zumbe Mnungu, Mnungu mkulu.