1 Mnungu ni unyilikilo wetu naho ludole lwetu

yehe ni wambizi wetu mwo lupisi lwose lwa makunt'ho.

2 Kwaivo hechogohe chochose umwo isi ikeza kusingisika,

milima nayo ikazingiza kwe kisingisa icho,

3 Hata uneva bahali neinde mwo kujubwanika,

milima nayo ikasingisika kwa mjubwaniso uwo.

4 Kuna kazuto kakwigala kinyemi mwo mzi wa Mnungu,

kwo ukalo wa Mnungu mkulu.

5 Mnungu eyaho ho mzi, woho haukudaha kusingiswa,

yehe naakink'he wambizi mtondotondo.

6 Want'hu wa si nawengile wogohi mkulu, useuta nawo nowituke,

Mnungu atint'hilaga niyo si yalungulumka.

7 Zumbe Mnungu ywa watowani ehamwenga na suwe,

Mnungu ywa Yakobo nuwo unyilikilo wetu.

8 Soni mkaule udamanyi wa Zumbe Mnungu,

mkaule vihungi ivo adamanye mwe isi.

9 Atenda nk'hondo ihalawe mwe isi yose

avunavuna zinyuta ne mijungo,

na nk'hindilo nazo azoka.

10 Akagamba, "Nyamaleni mkamanya ni miye Zumbe Mnungu,

miye nenitogolwe mwe ziisi zose

naho nenitunywe mwe si yose."

11 Zumbe Mnungu ywa watowani ehamwenga na suwe,

Mnungu ywa Yakobo naho ni unyilikilo wetu.