Salmos 75

Mnungu niye mlamuzi

1 Chakutogola weye Mnungu, chakutogola,

chabwelekeza ukulu wako,

na kusimuila ukulu we zimbuli izo udamanye.

2 Mnungu agamba, "Hiika lupisi lwedi lwa kusengela,

lupisi ulo nenisengele kwa uwagilwa.

3 Umwo isi ikazingiza,

na vose vimndani vikasingisika,

ni miye hudamanya zink’hongelo zakwe zitogile.

4 Nawagamba wakukeduvya wase kukefenya,

naho hemwiina uwagilwa msekukeona, 5 naho wasekunda na keduvya, naho wasekulonga kwa kukefenya."

6 Usengelo haukulawa nt’hendelo zose za si,

hegu kulawa kwe dijangwa,

akudaha kumkweza mnt’hu

7 Mnungu niye akusengela,

amseleza mnt’hu yeyose naho amkweza yeyose.

8 Zumbe ana kikombe mwo mkono wakwe

kimema divai ikukola ya maya yakwe,

naaigide naho want’hu waihi nawainywe,

heiye, nawainywe mpaka twent’he yo mzigilizo.

9 Mna miye neniibwelekeze mbuli ino mazuwa yose,

nenikeme nt’hogola kwa Mnungu ywa Yokobo.

10 Naauuse udahi wa waihi,

mna udahi wa wawagilwa nougenyezwe.