1 Gwee Mtuwa Mlungu, hashi gugoloka kutali?

Ntambu gaa gulififa shaka sha ntabiku?

2 Kwa mtiti wankontola wawawinda wahushu,

wahushu ndo yawagomiziwa na migomiziwu ya wakontola.

3 Mkontola kalizyumira shapa shakuyi shidoda,

muntu yakana shapa kapangira na kumlema Mtuwa Mlungu.

4 Kwa mtiti gwakuyi mkontola kalihola,

Mlungu hapakandeti shoseri.

5 Njira za mkontola zifanikiwa mashaka goseri,

kwakuyi toza zaku ziwera kutali na maholu gakuyi,

na kawabeziya wankondu wakuyi woseri.

6 Kalihola mumoyu pakalonga, hapeni ntikinyiki,

hapenintabiki nakamu mukulikala kwangu.

7 Mlomu gwakuyi gumema pangira, mpaya na vitiliziwu,

nalulimi lwakuyi lulonga visoweru vidoda na ukontola.

8 Kalififa muvijiji agawu pakalotera,

kamlagi kwa bada muntu yakahera shidoda.

Masu gakuyi gamgwadira muntu yakonda,

9 kalotera kwa masu gakuyi gambira simba.

Kanyata su kawabati yawahera likakala,

kawagomiziya kwa mgomiziwu gwakuyi na kuwatola.

10 Yawahera likakala wakangalwa na kugusiwa pasi,

wagomiziwa na muntu mkontola yakana makakala.

11 Mkondola kalihola mmoyu mwakuyi, Mlungu kalwaluwa,

kashififa sheni shakuyi, kawonandiri nakamu!

12 Gwee Mtuwa Mlungu, gugoloki, guwakomi,

naguwalyaluwa yawatabika.

13 Hashi muntu mkontola kambeziya Mlungu,

mumoyu gwakuyi kulitakulira, Mlungu hapenikantozi?

14 Kumbiti gwenga guziwona ntabiku zyawawonerwa,

nagwenga mashaka goseri gwakala kuwatanga.

Gwee Mlungu, yakahera likakala kakutumbira gwenga,

gwenga guwera mtanga kwa washiwa

15 Gugamegi makakala ga mkontola na mdoda,

gumkomangi kwa ukontola wakuyi woseri wakatenditi,

Nawuwera kayi.

16 Mtuwa Mlungu ndo mfalumi gwa mashaka goseri,

Maisi hagawuki kulawa muisi yakuyi.

17 Mtuwa Mlungu, gupikanira shawafira wantu yawahera likakala,

guwagangamiziya moyu na kuwapikinira.

18 Haguwatenderi haki washiwa na yawawonerwa,

su wantu yawawera litapaka nawaweza kayi kujega lyoga.