1 Gwee Mtuwa Mlungu, hanimbi ufiru waku mashaka goseri,

hanivibweleri viyiwuku vyoseri waminika waku.

2 Hanongi ufiru waku ulikala mashaka goseri,

waminika waku ugangamala handa kumpindi.

3 Gulongiti, "Ntenda lipatanu na msyagula gwangu,

nimlapira ntumintumi gwangu Daudi.

4 Kayi haniwugangamaziyi wiwuka waku mashaka goseri,

na haniwuendelezi ufalumi waku viwuku mpaka viwuku."

5 Gwee Mtuwa Mlungu, mpindi na zizyumi makangashu gaku,

wantumintu wa kumpindi na wawuzyumi uwaminika waku.

6 Gaa kumpindi yakaweza kalifaniziya na gwenga Mtuwa Mlungu?

Kwahera yakawera teratera na gwenga pakati pa viwumbi vya kumpindi,

7 gwee Mlungu gutirwa palijojoniku lya wananagala,

woseri yawakuzyengeta wanalyoga.

8 Gwee Mtuwa Mlungu, Mlungu yagwana makakala goseri, ndo gaa yakawera na makakala handa gwenga,

gwee Mtuwa Mlungu uwaminika waku ukuzyengeta wega zoseri.

9 Gwenga gukolamlima bahali payitimbuka,

makupala gakuyi pagakwena gwenga guganyamaziya.

10 Gumposholiti njoka Rahabu na kumlaga,

guwapasiyiti wankondu waku kwa makakala gaku.

11 Mpindi ndo za gwenga viraa pasipanu ndo paku,

gunyawiti pasipanu na vintu vyoseri yaviwera amu.

12 Gwenga gunyawiti kushana na kusika,

Migongu Tabori na Herimoni yankukuzyuma litawu lyaku kwa nemeru.

13 Liwoku lyaku lyana uwezu,

liwoku lyaku lyana makakala na likanka!

14 Waminika na haki ndo lyanjiru lya ukolamlima waku,

ufiru na waminika vikulongolera!

15 Mbaka wantu yawamana kukuzyuma kwa kukufyapilira,

yawatyanga muulangala mwaku, gwee Mtuwa Mlungu.

16 Wanemelera paluwala poseri toziya ya gwenga,

kwa haki yaku wanyasulwa.

17 Gwenga ndo mkulu na makakala gawu,

toziya ya shibali shaku tupata ukanka.

18 Gwee Mtuwa Mlungu, ulolera wetu ulawa kwaku,

mfalumi gwetu kalawa kwa gwenga yaguwera Mnanagala gwa Israeli.

19 Makashu gulongiti mumalola, guwagambiriti wantumintumi waku waminika,

"Nimpanana makakala shikambaku yumu,

nimkwisa ayu yanimsyaguliti pakati pa wantu.

20 Nimpata Daudi, ntumintumi gwangu,

nimswaga lipaki lyangu kaweri mfalumi.

21 Liwoku lyangu halimkoleri,

makakala gangu hagamgangamaziyi.

22 Wankondu hapeni wawezi kumzyanga,

pota wakontola hapeni wamwoneri.

23 Neni haniwaposholi wankondu wakuyi kulongolu kwakuyi,

haniwagamiziyi wankondu yawamkalalira.

24 Uaminika na ufiru wangu yawahera mpeleru hawuweri na yomberi,

kwa litawu lyangu hakapati ukanka.

25 Haniwugangamaziyi ukolamlima wakuyi,

kulawa bahari mpaka nshemba.

26 Yomberi hakanshemi, gwenga ndo tati gwangu.

Mlungu gwangu, litalabuhi lya ulopola wa neni.

27 Neni hanimtendi kuwera mwiwuka gwangu gwa kwanja,

mkulu kuliku wafalumi woseri pasipanu.

28 Ufiru wangu haniutuli mashaka goseri,

na lipatanu lyangu kwakuyi halilikali mashaka goseri.

29 Haniwugangamiziyi wiwuka wakuyi wa shifalumi mashaka goseri,

na ufalumi wakuyi haulikali handa mpindi mashaka goseri."

30 "Wiwuka wakuyi pawuleka lagiru lyangu,

na pawafatandiri malagalira gangu,

31 handa pawalema kujimira malagalira gangu

na kuleka kukola lagiru zyangu,

32 haniwasyatangi mboku toziya ya madoda gawu,

haniwakomi kwa makomangu toziya ya ukontola wawu.

33 Kumbiti hapeni ndeki kumfira Daudi,

pota kuwutenda uwaminika waneni kuwera mpayu.

34 Hapeni megi lipatanu lyangu na yomberi,

pota kugalambula shisoweru shantakuliti kwakuyi."

35 "Nilirapa mala yimu kwa unanagala wa neni,

na neni hapeni nimpayili Daudi.

36 Wiwuka wakuyi hawulikali mashaka goseri,

na ufalumi wakuyi hawulikali kulongolu kwaneni handa mshenji,

37 hawulikali mashaka goseri

handa lyezi

ntambu yalilawira kuliyera."

38 Kumbiti vinu gwee Mlungu, gumwasa na kumlema,

gumkalalira mfalumi gwaku yagumlumikiti.

39 Gulimega lipatanu lyagulitenditi na ntumintumi gwaku,

gulyasa lijenjeri lyakuyi mlidikudiku.

40 Guvibomola vibambaza vyoseri za mji gwakuyi,

gubenanga maboma gakuyi.

41 Woseri yawapita watola kwa makakala lunda zakuyi,

kawera gwa kubeziwa na wapakwegera wakuyi.

42 Wankondu wakuyi guwapanana ukanka,

guwanemiziya wankondu wakuyi woseri.

43 Ligumba lyakuyi gulitenda lidufuki,

gumleka kakankwi kunkondu.

44 Guwusiyi uweru wakuyi,

guwugusiya ukolamlima wakuyi.

45 Gupungula mashaka ga untemba wakuyi,

gumsoniziya.

46 Gwee Mtuwa Mlungu, hagulififi mashaka goseri?

Maya gaku hagaki handa motu mpaka ndii?

47 Guliholi kuwera makaliru gangu gagamira kalongola,

hashi gumuumbiti muntu pota toziya?

48 Gaa yakaweza kulikala pota kahowi?

Gaa yakaweza kutuga kuhowa?

49 Gwee Mtuwa, ufiru waku wamakashu wakoshi,

weni gumlapiliti Daudi kwa waminika waku?

50 Gwee Mtuwa, guliholi ntambu yakigirangwa ntumintumi gwaku,

ntambu yahepelera pankalipirwa na wantu woseri.

51 Gwee Mtuwa Mlungu guwona wakondu waku ntambu yawamlonganga mswagwa lipaki gwaku,

ntambu yawamjongera msyagulwa gwaku kila kwakagenda.

52 Kazyumi Mtuwa Mlungu mashaka goseri!

Amina, Amina!