1 Mbaka yakalekeziwitwi vidoda vyakuyi,

nakuwusilirwa makosa gakuyi.

2 Mbaka muntu mweni Mtuwa Mlungu kamuwalangirandiri likosa,

mumoyu mwakuyi kahera upayu.

3 Shaka paweriti nenetakuli vidoda vyangu,

weriti nonda kwa kulira paluwala poseri.

4 Paluwala na pashiru gunkomangiti,

likakala lyangu lipeliti,

gambira mangami shaka sha shiyangazi.

5 Shakapanu ntakuliti vidoda vyangu kwagwenga,

pota niwufifandiri ukontola wangu,

ntakuliti makosa gangu kwaku

nagwenga gundekeziya vidoda vyangu vyoseri.

6 Nakaka malawa pagankagalaku hapeni ganfikiri.

7 Gwee ndo liboma lyangu,

gundolera muntabiku,

gunzegetera nyimbu za kukombolwa.

8 Mtuwa Mlungu kalonga, hanikufundi na kukulanguziya njira yagufiruwa kufata.

Hanikutakuziyi na kukutula weri.

9 Naguwera mzigizigi handa farasi ama nyumbu,

weni mpaka watawalilwi lugoyi mumulomu,

ndo wajimiri kulonguziwa.

10 Wakontola hawapati ntabika ivuwa,

kumbiti yawamtumbira Mtuwa Mlungu, hawazyengetwi na ufiru wakuyi.

11 Munemeleri na kufyapilira

toziya ya Mtuwa Mlungu mwenga waminika,

mnemeleri na kufyapiliri mwenga yamuwera na moyu guherepa.