1 Nongiti, "Hanigaloleri makaliru gangu,

naniza kutenda vidoda kwa visoweru vyangu.

Hanyamali wakontola pawawera pakwegera naneni."

2 Weriti handa bebi, pota kulonga shintu,

nyamaliti kumbiti mpatitindiri mbaka.

Ntabiku yaneni yongelekiti kuwera ikalipa,

3 Magaziya ganeni ganunguziya mmoyu.

Ntambu yaniliholiti ndo ntambu yantabikiti,

shakapanu visoweru avi vindawa.

4 "Gwee Mtuwa Mlungu, gung'ambili upeleru wangu,

mashaka gangu ga kulikala gasigala maninga,

nivimani hanilikali vinja vininga."

5 Kumbiti gunupa makaliru mafupi nentu!

Makaliru gangu shintundiri kulongolu kwaku.

Nakaka, kila muntu ndo handa lyega hera!

6 Nakaka, kila muntu kapita handa lisisi,

makakala gakuyi goseri shintundiri,

kajojonira lunda, kavimanandiri gaa hakayitenderi!

7 Gwee Mtuwa Mlungu, vinu ndolelera shishi?

Litumbiru lyaneni ndo gwenga!

8 Gundopoli mumakosa gangu goseri,

nagujimira wazigizigi wantenderi lijonga.

9 Wera handa muntu, yakatakulandiri shintu,

toziya gwenga ndo yagutenditi aga.

10 Nagungomanga kayi,

sambira howa kwa makomangu gaku.

11 Gumkomanga muntu vidoda vyakuyi kwa kumkalapira,

guhalibisiya handa mehi ntambu yakahalibisiya shilii shakafira.

Nakaka, kila wantu ndo handa lyegahera!

12 Gwee Mtuwa Mlungu gupikiniri kuluwa kwangu,

gupikaniri kulira kwangu,

nagulikala jii pandira.

Mana neni handa mhengahera yakapita,

ntambu yawaweriti wazewi waneni woseri.

13 Shondi gundeki su nemeleri shididini,

pamberi hanenihowi na kwagamira nakamu.