1 Mmuzyumi Mtuwa Mlungu!

Hanongi mayagashi Mtuwa Mlungu kwa moyu gwangu goseri,

mu lijojoniru lya wantu yawamguwira Mlungu.

2 Matendu ga Mtuwa Mlungu ndo makulu nentu!

Woseri yawaganemelera wagaholera.

3 Kila shakatenda shimema uweru na ligoya,

haki yakuyi ilikala mashaka goseri.

4 Katenda matendu gakuyi ga kulikangasha gaholuwi,

Mtuwa Mlungu ndo mheri na kana lusungu.

5 Kankuwapanana shiboga yawamguwira,

kalyaluwandiri lipatanu lyakuyi mashaka goseri.

6 Kawalanguziya wantu wakuyi uwezu wa matendu gakuyi,

kwa kuwapanana isi za maisi gamonga ziweri lunda yakuyi.

7 Matendu gakuyi ndo ga haki na ga kwaminika;

lagiru zakuyi zoseri ndo za kutumbilwa.

8 Lagalira zakuyi zigangamala mashaka goseri;

zilaviwa kwa haki na waminika.

9 Kawalopoliti wantu wakuyi

na kutenda nawa lipatanu lya mashaka goseri.

Yomberi ndo mnanagala na gwa kutirwa!

10 Kumguwira Mtuwa Mlungu ndo shanjiru sha luhala;

woseri yawazijimira lagiru zakuyi wana luhala.

Zyuma zakuyi zilikala mashaka goseri.