1 Mlungu kamanika mu isi ya Yuda,

litawu lyakuyi ndo likulu mu Israeli.

2 Lilingu lyakuyi lya aku Salemu,

na kalikala aku kulugongu Sayuni.

3 Aku kamegiti misali ya motu yawankondu,

lusegeyu na magumba na vikomangiru vyoseri vya nkondu.

4 Gwee Mlungu, gukwiswa na mkulu nentu,

kuliku migongu yayimema wanyama wa muntundu.

5 Yawana makakala wapokitwi lopola zawu,

toziya wagonjiti fofofu,

Makambaku wa nkondu wawezandiri kunyasula mawoku gawu kulikomanga.

6 Gwee Mlungu gwa Yakobu, paguwakalipiliti,

farasi na wakwenafarasi waguwiti na kuhowa.

7 Gwee Mlungu, ndo gwa kutiliziya nentu!

Gaa yakaweza kugoloka kulongolu kwaku pagukalala?

8 Gubweriti toza yaku kulawa kumpindi,

pasipanu poseri patiliti na kunyamala jii,

9 pagugolokiti kutoza,

nakuwalopola woseri yawawoneritwi pasipanu.

10 Maya gaku kwa wantu gakujegera zyuma,

yawaponikiti kulawirana na maya gaku hawakombolwi.

11 Mlirapi kwa Mtuwa Mlungu, Mlungu gwenu na mshitendi shamlongiti,

mwenga yamuwera pakwegera mmupanani Mlungu gwa kutiliziya mafupu.

12 Yomberi kawalaga wakulu,

na kawatiriziya wafalumi wa pasipanu.