1 Gwee Mtuwa Mlungu, nikulilira,

Gwenga litalabuhi lya uponera wangu nagulema kumpikanira,

pagumpikinirandiri,

haweli pamuhera na walii yawasuluka kulilindi lya wahowiti.

2 Gupikinili liziwu lya kuluwa kwangu,

panikulilira guntangi,

panipanyasulira mawoku gangu kulihekalu lyaku linanagala.

3 Nagunkomanga pamuhera na wantu wadoda,

walii yawatenda ukontola,

wantu yawatakula na wayawu visoweru vya ponga,

kumbiti mumoyu wamema shuki.

4 Guwakomangi kulawirana na ntambu yawatenditi,

kugenderana na makontola gawatenditi.

Guwakomangi kulinganira na matendu gawu weni,

guwatenderi galii gawafiluwa kutenderwa.

5 Walisherandiri mahengu ga Mtuwa Mlungu,

pota matendu gakatenditi.

Toziya ayi hakawamalili mashaka goseri.

6 Kakwiswi Mtuwa Mlungu,

toziya kapikinira luwa yangu ya utanga.

7 Mtuwa Mlungu kampanan makakala na kandolera,

hanimtumbiru kwa moyu gwangu goseri.

Kandopola na moyu gwangu gumema nemeru,

na hanimwimbili nyimbu za mayagashii.

8 Mtuwa Mlungu kawapanana makakala wantu wakuyi,

yomberi kamlolera na kumlopola mfalumi yakamsyaguliti.

9 Gwee Mtuwa Mlungu, guwalopoli wantu waku,

guwatekeleri wantu awa yawawera isi yaku.

Guweri mshungaji gwawu na guwaloleri mashaka goseri.