1 Mwenga wantu woseri pasipanu mumnemeleri Mlungu.

2 Mwimbi kwajili ya uweru wa litawu lyaku,

mmuzyumi kwa uweru wakuyi.

3 Mumgambili Mlungu, matendu gaku gakangasha nentu!

Makakala gaku ndo makulu nentu

ata wankondu waku waperuwa makakala kwa lyoga.

4 Pasi panu poseri pakuguwira gwenga,

walimbiri zyuma litawu lyaku

wantu woseri wakuzyumi gwenga.

5 Mwizi na mlori vitwatira vyoseri vyakatenda Mlungu,

katenda vitwatira vya kutiriziya pakati pa wantu.

6 Kagalambula bahari iwera isi iyuma,

wantu wapititi amu kwa magulu,

hangu tunemeleriti toziya yakuyi.

7 Kakolamlima mashaka goseri kwa likakala lyakuyi,

Masu gaku gawalola wantu woseri.

Mkontola yoseri nakajera kuwera mkulu kuliku yomberi.

8 Mmuzyumi Mlungu gwetu, mwenga maisi goseri;

mbweri zyuma zakuyi zipikaniki.

9 Yomberi kagalolera makaliru getu,

pota katulekandiri tuguwi.

10 Gwee Mlungu gutujera,

gutugulula kwa motu gambira madini ga feza.

11 Gutwingiziya mumgomiziwu,

gututenda tuweri na ntabiku.

12 Guwaleka wantu watutimbangi mumtuyi,

tupita mumotu na mumashi,

kumbiti vinu gutujega mu isi yayimema kila shintu.

13 Hanizi ukaya kwaku na tambiku za kulunguziya,

na hantendi vyantakuliti kwaku,

14 vilii vyatakuliti kwamlomu gwangu namweni,

vyayoweriti paweriti mkutabika.

15 Hanikulaviliri litambiku lya kulunguziwa lya wankanyama waherepa,

litambiku lya kulunguziwa lya kondolu shipalu,

litambiku lya kulunguziwa lya ng'ombi na mbuzi.

16 Mwizi na mpikaniri woseri mwenga yamumguwira Mlungu,

naneni haniwatambiri gakantenderiti.

17 Neni nimshema kwa liziwu,

zyuma zakuyi nizibwera.

18 Handa mempangi makontola mumoyu mwangu

Mtuwa Mlungu mekampikinirindiri.

19 Kumbiti nakaka Mlungu kampikinira,

na kayambira likutu maluwa gangu.

20 Kazyumwi Mlungu,

toziya kakulemandiri kuluwa kwaneni

pota kalekandiri kuntendera maheri.