1 Hanongi mayagashii Mlungu kwa moyu gwangu goseri,

hanigatambiri matendu gaku goseri ga kulikangasha,

2 Hanemeleri na kukufyapilira gwenga,

gwee Mlungu Mkulu hanikuzyumi kwa nyimbu.

3 Shaka shagulawiriti wankondu wangu wawuya kumbeli,

kulongolu kwaku walikwaliti na kwagamira.

4 Gunteteya kulinganira na shilii shantenditi,

gulikala mushiti shaku sha ukulu, pagulaviya toza yahaki.

5 Gugakalipira maisi,

guwahalibisiya wakontola,

matawu gawu hapagaholwi kayi.

6 Wankondu wagamira mashaka goseri,

guyitupulira kutali miji yawu,

ata liholu lyawu lyagamira.

7 Kumbiti Mtuwa Mlungu kakolamlima mashaka goseri,

katula shiti shakuyi sha ukulu kapati kutoza.

8 Kankupatoza pasipanu kwa haki,

kagaamuwa maisi kwa waminika

9 Mtuwa Mlungu ndo liboma lya wantu yawawonerwa,

yomberi ndo litugiru shaka sha ntabiku.

10 Yawakumana gwenga, Mlungu wakutumbira,

toziya gwenga Mlungu, guwawasandiri yawakusakula.

11 Mumwimbiri zyuma Mlungu yomberi kakolamlima aku sayuni.

Mgabweleri maisi mirandu yakatenditi,

12 toziya Mlungu kawawuzilira shawatenditi walaga,

nakaka kalyaluwandiri kulira kwa wantu yawawonerwa.

13 Gwee Mtuwa Mlungu gumoneri lusungu!

Guloli ntabiku yantabisiwa na yawankalalira,

gundopoli kulawa mukuhowa,

14 su ntambi zyuma zaku kulongolu kwa wantu wa sayuni,

na hanemeleri toziya gundopola.

15 Wantu wa maisi wapatukira mulirindi lyawabawiti

wagomiziwa magulu gawu mumugomiziwu gwawawufifiti.

16 Mtuwa Mlungu kalilanguziya ntambu yakawera, nakutenda toza.

Wantu wakontola wagomiziwa kwa matendu gawu mweni.

17 Wakontola hawasuluki kuzimu,

vilavirii maisi goseri wambeziya Mlungu.

18 Kumbiti wahushu hapeni walwaluwi mashaka goseri,

litumbiru lya wawonerwa hapeni lyagamiri mashaka goseri.

19 Gugoloki Mlungu!

Nagumleka muntu kakubeziyi!

Gugajojoniri maisi kulongolu kwaku,

gugatozi.

20 Mtuwa Mlungu guwatendi walendemeli kwa lyoga,

wantu wa maisi wavimani kuwera womberi ndo wantu hera!