1 Gwee Mtuwa Mlungu, Mlungu yakawuzilira,

Gwee Mlungu mwuzilira, guwoneki!

2 Gugoloki, gwee mtoza gwa wantu woseri,

guwakomangi wana mtiti ntambuyawafiruwa!

3 Gwee Mtuwa Mlungu, mpakandii wakontola hawendeleyi kuwera?

Mpakandiri, wakontola hawendeleyi hawalizyumi?

4 Wakontola wayowera visoweri vya mtiti

wakontola woseri wana malingisu.

5 Gwee Mtuwa Mlungu, wantu waku wankulaguwa,

wawatabisiya wantu yaguwasyaguliti waweri waku.

6 Wawalaga wakenja na wahenga,

wawalikitula wana yawahera tati!

7 Walonga, "Mtuwa Mlungu kawonandiri,

Mlungu gwa Yakobu kavimanandiri"

8 Mwenga wazigizigi wa upeleru, mliholi shididini!

Mwenga wazigizigi, hampatindii umani?

9 Yakatenditi likutu, hashi, kawezandiri kupikinira?

Yakawumbiti lisu, hashi, kaweza ndiri kuwona?

10 Yakakomanga maisi, kawezandiri kukalipira?

Yakafunda wantu, kahera umani?

11 Mtuwa Mlungu kagamana maholu ga wantu,

kavimana handa gafaandiri shintu.

12 Gwee Mtuwa Mlungu, mbaka muntu yagumfunda vitendu viherepa,

muntu yakafunda lagiru yaku,

13 su lishaka lya kutabika kapati kwoyera,

mpaka wakontola wabawirwi lirindi.

14 Toziya Mtuwa Mlungu hapeni kawaleki wantu wakuyi,

hapeni kawasi awa yawawera wakuyi.

15 Toziya toza hazilaviwi kayi kwa haki,

na waminika woseri wa moyu guherepa hawazitendi.

16 Gaa yanakantangi kumkoma muntu mkontola?

Gaa yanakaweri uwega wangu toziya ya wadoda?

17 Mtuwa Mlungu mekatangindiri,

meng'endi kala muisi yawahowiti.

18 Panongiti, "Handa hatyerebuki",

ufiru waku, gwee Mtuwa Mlungu, untangiti.

19 Magaziwu ga moyu gwangu pagongereka,

gwenga guzyangazyanga na kunsekeziya.

20 Gwenga guweza ndiri kutenda pamuhera na watoza wangesera,

yawapanga mbinu za kuteteya makontola.

21 Walijimirana kuwagamiziya waaminika,

na kuwatoza wantu wahera shidoda walaguwi.

22 Kumbiti Mtuwa Mlungu ndo litugiru lyangu,

Mlungu gwangu ndo litalabuhi lya uponera waneni.

23 Ukontola wawu hakawawuziliri weni,

hagawagamizili kutali toziya ya udoda wawu.

Mtuwa Mlungu gwetu, hakawagamiziyi.