1 Gwee Mtuwa Mlungu, gundopoli na wantu wadoda,

gunshingi na wantu wankesera.

2 Wantu awa walihola madoda mumiyoyu mwawu mashaka goseri,

wanjisha ndewu kila shaka.

3 Milimi yawu inausungu handa ya njoka,

mumilomu mwawu mwana visoweru vya usungu handa njoka moma.

4 Gwee Mtuwa Mlungu, gumbusiyi kulawa mumawoku ga wantu wadoda,

gunshingi na wantu wankesera

weni wapanga kungusiya.

5 Wanamtiti wanyambika mgomiziwu,

wayalika ngoyi handa wavu,

wafifa migomiziwu munjira su wangomiziyi.

6 Nimgambira Mtuwa Mlungu, "Gwenga ndo Mlungu gwangu."

Gwee Mtuwa Mlungu, gupikinili liziwu lya kuluwa kwangu.

7 Gwee Mtuwa Mlungu, Mtuwa Gwangu, mlopola gwangu mkulu,

gundoleliriti shaka sha nkondu.

8 Gwee Mtuwa Mlungu, naguwapanana wakontola vyawafira,

naguleka mipangu yawu midoda nayifanikiwa na wiza kulitumba.

9 Naguwaleka wakondu wangu wakanki,

ukontola wa miromu yawu iwapati weni.

10 Makala ga motu gawatulukili,

wapatuziwi mumalindi matali, nawagoloka kayi.

11 Yawawatakula wamonga nawawera na mpatiru muisi,

ukontola uwapati wankesera na kuwaagamiziya nakamu.

12 Mtuwa Mlungu nivimana kuwera guwateteya wahushu,

kawapanana haki yawahera shintu.

13 Nakaka yawana haki hawalizyumi litawu lyaku,

waaminika hawalikali kwa gwenga.