1 Mlungu ndo tugira yetu na likakala lyetu,

yomberi ndo mtanga gwetu gwa pakwegera mashaka goseri ga kutabika.

2 Hangu hapeni tutiri shintu ata pasipanu papatikinyika

na vigongu pavilendemera pakati pa bahali,

3 ata bahari payiliputa na kutiliziya,

na migongu ilendemera kwa makomangu gakuyi.

4 Kwana lushemba lwalujega nemeru kumji gwa Mlungu,

kaya nanagala yakawera kumpindi.

5 Mlungu kamulushi alu na lweni hapeni lutikinyilwi,

Mlungu hakalupanani utanga mandawira putiputi.

6 Maisi gatira nentu na kolamlima zyangutikinyika,

Mlungu kaguguma na pasipanu palumbujuka.

7 Mtuwa gwa mashonta kapamuhera na twenga,

Mlungu gwa Yakobu ndo mlolera gwa twenga

8 Mwizi mloli matendu ga Mtuwa Mlungu,

muwoni makangashu gakatenditi pasipanu.

9 Kamalira nkondu zoseri pasipanu,

kamegamega upindi na mgoha,

kalunguziya lusegeyu kwa motu.

10 Kalonga. "Mnyamali" "na kuvimana handa neni ndo Mlungu!

Neni hanyasulwi pakati pa maisi goseri,

neni nkwiswa pasipanu poseri!"

11 Mtuwa Mlungu gwa mashonta ka pamuhera na twenga,

Mlungu gwa Yakobu ndo tugira ya twenga.