1 Gwee likambaku, hashi gulitumbira udoda waku?

Kumbit uaminika wa Mlungu ulikala mashaka goseri.

2 Kila shaka gupanga mahalibisiya,

lulimi lwaku ndo handa shiwembi shikalipa.

Lwalutakula mirandu ya upaya.

3 Gwenga gufira ukontola kuliku uheri,

gufira kutakula mpayu kuliku unakaka.

4 Gwenga gufira visoweru vya kuharibisiya,

na lulimi lwaluyowera mpayu.

5 Hangu Mlungu hakakusulusiyi muuhalibisiya mashaka goseri,

hakakunyasuli na kukuwusiya ukaya kwaku,

hakakuwusiyi muisi yawawera wakomu.

6 Waminika hawawoni aga na kutira,

shakapanu hawakuseki na kulonga,

7 mloli yagampatiti muntu ayu!

Yomberi kafirandiri Mlungu kaweri tugira yakuyi,

ila katumbiriti ulunda wakuyi uvuwa na kawera mgangamala kulaga wamonga.

8 Kumbiti neni ndo handa mtera gwa mzeituni muwisi,

yaguherepa munumba ya Mlungu na hanendeleyi kuzitumbira tanga zakuyi mashaka goseri.

9 Gwee Mlungu hanongi mayagashi mashaka goseri,

toziya ya mirandu yagutenditi,

hazyumi litawu lyaku kulongolu kwa wantu waku.