1 Gwee Mtuwa Mlungu, gupikiniri kuluwa kwa neni,

na kuluwa utanga kwaneni kukufikili.

2 Nagulififa kutali naneni,

pawera muntabika!

Gunyambili likutu lyaku,

gunankuli kalongola shaka panikuluwa!

3 Mashaka gangu gankupita handa lyosi,

mihonju yangu ilungula handa makala ga motu.

4 Moyu gwangu guposholwa handa ntundu yayiyuma,

nahera ata matamata ya shiboga.

5 Kulawirana na kwinginika kwa neni,

nsigala mihonju hera.

6 Wera handa lisisigira gwa kushiwala,

handa lisisigira mumahami.

7 Ngonjandiri,

wera gambira mpongu yakakala gwekayakuyi pampindi pa shitwiku.

8 Mashaka goseri wankondu wangu wambeziya,

walitendera litawu lyaneni kuwapangira wamonga.

9 Malivu gawera shiboga shaneni,

nigahanganyia masozi na shilandu shangu,

10 toziya ya nkalaliru na maya gaku,

ndo mana guntola na kunasira kutali.

11 Makaliru gangu ndo handa lisisi lya pashimihi,

nyala handa ntundu.

12 Kumbiti gwenga, Mtuwa Mlungu gukolamlima mashaka goseri,

litawu lyaku liholuwa mu viyiwuku vyoseri.

13 Gwenga hagugoloki na kuguwonera lusungu mji gwa Sayuni,

toziya shaka shisoka sha kugutendera maheri.

Shaka shakuyi shashipangitwi shisoka.

14 Wantumintumi waku wagufira nentu,

tembera guwera mahami,

waguwonera lusungu,

tembera guhalibika nakamu.

15 Maisi hawalipanani ligoya litawu lya Mtuwa Mlungu,

wafalumi woseri pasipanu hawatiri uweru waku,

16 shaka Mtuwa Mlungu hakayinyawi kayi mji gwa Sayuni,

na hakawoneki ntambu yakawera muweru,

17 shaka pakajimira maluwa ga mhushu,

pota kugalema maluwa gawu.

18 Mlandu agu gulembwi toziya ya viyiwuku vyaviza,

yanawiwuki wamzyumi Mtuwa Mlungu.

19 Mtuwa Mlungu hakaloli pasi kulawa pananagala pakuyi yapawera pampindi,

kulawa kumpindi hakaloli pasipanu,

20 su kupikanira kulira kwa watatilwa,

na kuwalekiziya yawatozitwi kulaguwa.

21 Hangu wantu hawabweri litawu lya Mtuwa Mlungu aku Sayuni,

zyuma zakuyi hazibwerwi aku Yerusalemu,

22 shaka wantu wa maisi pawajojonika pamuhera na falumi

su kumtendera Mtuwa Mlungu.

23 Mtuwa Mlungu kampungula makakala nangali munjira,

kagafupiziya makaliru gangu.

24 Naneni ntakula, gwee Mlungu gwangu, naguntola vinu

shaka nangali mntemba.

Mana gwenga gulikala viyiwuku na viyiwuku.

25 Makashu gwenga guwumbiti pasipanu,

mpindi ndo lihengu lya mawoku gaku.

26 Azi haziwuki, kumbiti gwenga hagusigali,

azi hazisakali handa nguwu.

Hagwasili kutali handa mavalu,

na zeni haziwusiwi.

27 Kumbiti gwenga ndo ulaulii mashaka goseri,

na vinja vyaku vyahera upeleru.

28 Wana wa wantumintumi gwaku hawalikali,

wiwuka wawu hawugangamaziwi kulongolu kwaku.