1 Mmuzyumi Mtuwa Mlungu!

Katekelerwa muntu yakamguwira Mtuwa Mlungu,

yakanemelera nentu kujimira lagiru zakuyi.

2 Wana wakuyi hawaweli wana likakala mu isi,

wiwuka wa muntu mwaminika hawutekelerwi.

3 Ukaya kwakuyi hakuweri na lunda zivuwa,

haki yakuyi hayilikali mashaka goseri

4 Kuwala kulangala kuluwindu kwajili ya wantu waheri,

na kwa yakana lusungu, mnyamalira na yakana haki.

5 Katekelerwa muntu mheri yakalaviya uwanda kwa manemu,

yakatenda mahengu gakuyi kwa haki.

6 Mana hapeni kasindi nakamu,

yakana haki hakaholwi mashaka goseri.

7 Hapenikatiri visoweru vidoda,

kana moyu gugangamala na kamtumbira Mtuwa Mlungu.

8 Kagangamala mumoyu, pota kutira,

nayomberi hakawawoni wankondu zakuyi wankusinda.

9 Kalaviya kwa kukalamuka, kawapanana wahushu,

haki yakuyi ilikala mashaka goseri,

muntu ayu hakapananwi ligoya nentu.

10 Wantu wakontola hawagawoni aga na kukalala,

wagayagaya menu kwa ngalaliru na kwagamira,

matumbiru ga muntu mdoda gagamira hera.