1 Gwee Mtuwa Mlungu nikushema,

gwizi kalongola guntangi!

Gulipikinili liziwu lyangu shaka panikushema!

2 Luwa yangu guyiyanki handa ubani,

panyasula mawoku gangu kwagwenga gunjimiri handa tambiku ya pashimihi.

3 Gwee Mtuwa Mlungu guguleweleri mlomu gwangu nagulonga makontola,

milomu yangu naitakula madoda.

4 Guleweleri moyu gwangu nagutenda madoda,

nantenda matendu makontola,

nankwegwa na yawatenda vidoda,

pota nawera mu misambu yawu.

5 Mbaka muntu mheri kankomi na kunkalipira kwa ufiru,

kumbiti njimirandiri kuzyumwa na wadoda,

mana nduwa mashaka goseri kugalema makontola gawu.

6 Wakulu wawu pawasangwa mumatalabuhi,

wakontola ndo hawavimani kuwera visoweru vyaneni vya nakaka.

7 Hawalongi, handa muntu yakalima na kukomanga mabulumunda vipandi vipandi

mihonju yawu ndo hayiwapalasiyi mumlomu gwa wantu yawahowiti.

8 Gwee Mtuwa Mlungu, neni nikutumbira,

Mlungu gwangu, nikutugira uponera kwa gwenga,

nagundeka mukutenduwa.

9 Gunshingi na migomiziwu yawanyambiliti,

gumponiziyi na migomiziwu ya wantu wakontola awa.

10 Wakontola wagomiziwi munyavu zawu,

naneni hampiti poneka.