1 Mzigizigi kalitakulila mmoyu,

kwahera Mlungu.

Woseri wawera wakontola,

watenda mirandu ya kukalaziya,

kwahera ata yumu yakatenda liheri!

2 Mtuwa Mlungu Kawalola wantu kulawa kumpindi,

kawoni handa kwana yoseri yakana umani,

yakamsakula Mlungu.

3 Kumbiti woseri watenda vidoda,

woseri wapotoka pamuhera,

kwahera yakatenda maheri,

kwahera ata yumu.

4 Hashi, woseri yawatenda makontola wavimanandiri shintu?

Wawaliya wantu waneni ntambu yawaliya mabumunda,

pota wanduwandiri neni Mtuwa Mlungu.

5 Kumbiti hawabatwi na lyoga likulu,

mana Mlungu ka pamuhera na waminika.

6 Mwenga wantu wadoda mvuluvutira galii wahushu gawafira kutenda,

kumbiti Mtuwa Mlungu ndo ntugira yawu.

7 Mbaka ukombola wa Israeli meusoki kulawa sayuni. Shaka Mtuwa Mlungu pakawawuziya mpatiru wantu wakuyi,

wiwuka wa Yakobu hawafyapiliri,

Waisraeli hawanemeleri.