1 Gwee Mlungu, gufiruwa zyuma aku sayuni,

wantu hawatendi naziri zawu,

2 toziya gwenga gwankula luwa.

Wantu woseri hawakwizili gwenga.

3 Makosa gangu pagantopeliti,

gwenga gundekeziyiti makontola gangu.

4 Mbaka ulii yagumsyaguliti,

nakumjimira kalikali muligeleri lyaku.

Twikutuziwa na maheri ga numba yaku,

namaherepa ga Numba Nkulu yaku nanagala.

5 Hagutwankuli kwa matendu gakulikangasha ga haki

gwee Mlungu gwa ulopola watwenga,

gwenga ndo litumbiru vya viwumbi vyoseri pasipanu

na wantu yawalikala kumwambu mwa bahali.

6 Kwa makakala gaku guyituliti migongu pahala pakuyi,

gwenga gulanguziya makakala gaku.

7 Gunyamaziyiti kuliputa kwa makupala ga bahari,

na gumalira makupala gakuyi

na kunyamaziya umatu wa wantu.

8 Pasipanu poseri pakangashwa,

na matendu gaku,

gutenda wantu wanemeleri,

kulawa kwagulawa mshenji mpaka kwaguzyeta mshenji.

9 Gwenga guyityangira isi na kuitowera mvula,

na guyitenda iweri na wolera na kuyileliziya.

Ina nshemba zazinyiririka mashi

su kuwapanana wantu viboga,

hangu ndo ntambu yaguyitanditi isi.

10 Matuta gakuyi gugalowiziya kwa mashi gavuwa

papalimitwi pamema mashi,

gutowiti mvula su kuloviya litapaka

na kuvitekelera vimeru vyakuyi.

11 Gushitekelera shinja kwa mabenangu gavuwa

kila pagupititi pamema mbatiru.

12 Pahala pa maliwuziwu kuntundu pamema mifugu,

vigongu vimema nemeru.

13 Maliwuziwu gamema kondolu,

lalanda zimema viboga,

vyoseri vifyapiliriti kwa nemeru.