1 Mtuwa Mlungu kakolamlima, gwe isi gufyapiliri!

Gwe visiwa gunemeleli!

2 Mawundi na luwindu dunyu vimzyengeta,

uaminika na haki ndo lyanjiru lya ukolamlima wakuyi.

3 Motu gulongolera kulongolu kwakuyi

na kuwalunguziya wankondu wakuyi wega zakuyi zoseri.

4 Lumeta lwakuyi lulangala pasipanu,

Pasipanu paluluwona palendemera.

5 Vigongu vilumbutuka handa unkombi kulongolu kwa Mtuwa Mlungu,

kulongolu kwa Mtuwa gwa pasipanu poseri.

6 Mpindi zibwera haki yakuyi,

wantu wa maisi goseri wawuwona uweru wakuyi.

7 Woseri yawaguwira shinyagu na woseri yawalitumbira wamlungu hawasoniziwi,

wamlungu woseri wasuntamala makukama kulongolu kwakuyi.

8 Wantu wa Sayuni wapikanira na kunemelera,

wantu wa Yuda wankufyapilira,

toziya ya toza zaku, gwee Mtuwa Mlungu.

9 Toziya gwenga Mtuwa Mlungu ndo gwakumpindi nentu kuliku pasipanu poseri,

guwera mkulu nentu kuliku wamlungu woseri.

10 Mwenga yamumfira Mtuwa Mlungu mkalaliri ukontola,

toziya yomberi kagalolera makaliru ga yawamwamini,

na kawalopola kulawa mmawoku mwa wakontola.

11 Gulangala guwawalira wantu yawana haki,

na nemeleru kwa wantu yawawera na miyoyu iherepa.

12 Mwenga yamwana haki mumnemeleri Mtuwa Mlungu,

mlongi mayagashi toziya ya litawu lyakuyi linanagala.