1 Gumzyumi Mtuwa Mlungu, gwee moyu yangu!

Gwee Mtuwa Mlungu, Mlungu gwangu, gwenga ndo mkulu nentu!

Gulivalasiya ukulu na uweru.

2 Guligibikira kulangala handa shivalu,

guziyalika mpindi handa liringu,

3 Gunyawa mpanda zya pahala paku pampindi pa mashi.

Gugatenda mawundi kuwera mbutuka yaku ya nkondu,

guguluka pampindi pa mpapatiru zya lyega,

4 gulitenda lyega kuwera mlagilagi gwaku,

motu na mambamba gakuyi kuwera wantumintumi waku.

5 Pasipanu gupatula gangamala pampindi pa miyanjiru yakuyi,

su nayitikinyika mashaka goseri.

6 Gupagibikiliti pasipanu kwa bahari handa nguwu,

na mashi gagibikira migongu mitali.

7 Pagugakalipiliti, mashi gatugiti,

pagapikiniriti kuwunguluma kwaku gatugiti,

8 migongu payinyasukiti mashi ganyinyirikiti kwanjira kumigongu, mpaka kululalanda,

mpaka pahala palii pagupapangiriti.

9 Gugatuliliti mbaka mashi aga,

nagiza gupagibikira kayi pasipanu.

10 Gwenga gutenda bwiru ziti mashi mu malalanda,

na kunyilirika pakati pa migongu.

11 Azi ziwapanana mashi wankanyama woseri wa kuntundu.

Amu punda wamntundu wapoliziya kwimiluwa kwawu.

12 Wampongu wa kulyela wanyawa vitukulu vyawu,

wankwimba pawawera muntambi zya mitera.

13 Kulawa pampindi pa migongu mashi guganyiririka,

na pasipanu gupamemiziya kwa lihengu lya lyaku.

14 Gutenda ntundu imeri toziya ya mifugu,

na vimeru kwajili ya matenderu ga wantu

su womberi wapati shiboga kulawa mulitapaka,

15 divayi ya kumkalamziya,

lipaki kwajili ya kung'ereng'eziya sheni shakuyi,

na libumunda lya kumpanana makakala.

16 Mitera ya Mtuwa Mlungu ipata mashi gavuwa,

mitera ya miyerezi yayiwera Lebanoni yakayiyaliti.

17 Amu, wampongu wanyawa vitukulu vyawu;

korongu kana numba mu mitera ya misonobali.

18 Migongu mitali ndo pakulikala pa mbuzi wa kuntundu,

na mpimbi wapata mafifu gawu mumatalabuhi.

19 Gulitenditi lyezi lilangaziyi vyaka;

mshenji guvimana shaka shakuyi sha kwinala.

20 Gujega luwindu kuwera pashiru,

na wankanyama woseri wa kuntundu wankulawa.

21 Wana wa simba wankuguguma wapati vyawawinga,

wankusakula viboga vyawu kulawa kwa Mlungu.

22 Mshenji pagulawa wawuya kwawalawiti,

na koyera mu mumpanga zyawu.

23 Panu na muntu kagenda kumahengu gakuyi,

na kutenda lihengu lyakuyi mpaka pashimihi.

24 Gwee Mtuwa Mlungu, gutenda mirandu ivuwa nentu!

Yoseri guyitenda kwa luhala!

Pasipanu pamema viwumbi vyaku.

25 Kutali kulii kwana bahari nkulu na ipanuka,

yeni imema viwumbi vyaviwalangikandiri,

viwumbi vikomu, vididini na vikulu.

26 Ndo mwazipita meli,

na ulii kanyama Lewiyatani yagumwumbiti kavini amu.

27 Woseri wankuhepera gwenga,

guwapanani shiboga shawu kwa shaka shakuyi.

28 Wankusola shoseri shilii shaguwapanana;

pangukuzumla liwoku lyaku wikuta weri.

29 Panguwatulira shisogu, watira,

paguwusiya pumla yawu, wahowa,

na kuwuya mulitapaka mwawalawiti.

30 Kwa pumla yaku guwanyawa woseri,

gwenga gupagalambula pasipanu kuwera pasyayi.

31 Uweru wa Mtuwa Mlungu ulikali mashaka goseri,

Mtuwa Mlungu kanemeleri mahengu gakuyi mweni.

32 Kapalola pasipanu napeni palendemera,

kayishinkula migongu nayeni ilaviya lyosi!

33 Hanimwimbili Mtuwa Mlungu makaliru gangu goseri,

hanimzyumi Mlungu gwangu mashaka goseri ganilikala.

34 Gwee Mtuwa Mlungu, gufiriziwi na maholu gangu aga,

mana gwenga ndo nemeru yaneni.

35 Yawana vidoda wagamiri nakamu pasipanu,

na wakontola nawawera kayi!

Gwee moyu gwangu gumzyumi Mtuwa Mlungu!

Gumzyumi Mtuwa Mlungu.