1 Mlungu gwangu,

Mlungu gwangu, mbona gundeka?

Mbona gwa kutali nentu kuntanga?

Hashi gupikanilandiri kulira kwangu?

2 Gwee Mlungu gwangu, ndira paluwala,

kumbiti gunankulandiri,

mbotanga pashiru,

kumbiti nyamalandiri.

3 Ata hangu, gwenga ndo Mnanagala na gulikala mushiti shikulu,

gwenga guzyumwa na wantu wa Israeli.

4 Wazewi wa twenga wakutumbiriti gwenga,

wakutumbiliti na gwenga guwalopola.

5 Wakuliliriti gwenga, walopolwa,

wakutumbiliti na womberi wasoniziwandiri.

6 Kumbiti neni na muntu ndiri,

wamona nashintundiri na wambeziya.

7 Woseri yawamona wantendera lijonga,

wandokola na kutikisiya mituyi yawu.

8 "Walonga, kamtumbiriti Mtuwa Mlungu,

Mlungu su kamkomboli!

Handa Mlungu kafiliziwa na yomberi,

su, kamlopoli!"

9 Kumbiti gwenga ndo yagundaviyiti mumtima mwa mawu gwangu,

gunteka poneka pashifuwa sha mawu gwangu.

10 Nikutumbiliti kwanjira kwiwuka kwangu.

Kwanjira ndawi mumtima gwa mawu gwangu gwenga guwera Mlungu gwangu

11 Nagulikala kutali na neni,

ntabiku yapakwegera,

pota kwahera muntu gwa kuntanga.

12 Wankondu wavuwa wanzyengeta handa ng'ombi shipalu,

wambabanika handa ng'ombi shipalu wanamakakala kulawa Bashani.

13 Handa simba yawaguguma pawapapula vyawawinda,

Wasama miromu su wankomangi.

14 Nitwa handa mashi,

mihonju yaneni yoseri iteguka,

moyu gwangu ndo handa ungombi,

ulumbuka mngati mwaneni.

15 Makakala gapera handa shikalangiru,

lulimi lwangu lunamatuka mmulomu gwaneni.

Gundeka mlidikudiku lya kuhowa.

16 Zyengetwa na shipinga sha wang'ang'a,

lijojoniru lya wakondola lizyengeta,

handa simba wanuma mawoku na magulu.

17 Nsigala mihonju hera,

wankondu waneni wandola na kunonganonga.

18 Wabagulana nguwu zangu,

na kugalambuziya simbi nguwu yangu.

19 Kumbiti gwee Mtuwa Mlungu, nagulikala kutali naneni.

Gwizi kalongola kuntanga.

20 Kundopoli neni kutali na ligumba,

gugalopoli makaliru mumikoji mwa wang'ang'a awa!

21 Gundopoli mmulomu mwa simba,

gundopoli neni kulawa magoli ga nyati awa

gwankula luwa yaneni.

22 Haniwatambili walongu wangu matendu gaku,

hanukuzyumi pakati pa lijojoniru lyawu panonga,

23 mwenga yamumguwira Mtuwa Mlungu,

mumzyumi Mtuwa Mlungu,

mwenga wiwuka woseri wa Yakobu mumpanani ligoya!

Mwenga wiwuka woseri wa Israel Mumguwiri!

24 Toziya yomberi kawawonandiri shintu yawahera makakala pota kuwabeziya,

na kawafifandiri sheni shakuyi,

kumbiti kawapikinira pawaluwa utanga.

25 Toziya yaku hanikuzyumi

mulijojonilu likulu lya wantu,

hantendi shanongiti kulongolu kwawu yawakuguwira.

26 Wahushu hawaliyi na kwikuta,

yawamsakula Mtuwa Mlungu hawamzyumi.

Mlungu kawapanani kulikala mashaka goseri!

27 Pasipanu poseri hawammani na

kumwuyira Mtuwa Mlungu,

makabila goseri hagamguwiri.

28 Toziya Mtuwa Mlungu ndo mfalumi,

na kagakolamlima maisi.

29 Walunda woseri pasipanu hawizi na kumsuntamali kulongolu kwakuyi,

na woseri yawafuwa hawang'ong'onali kulongolu kwakuyi,

pamuhera na woseri yawawezandiri kuwera na ukomu.

30 Viyiwuku havimtenderi,

wantu hawavitambiri viyiwuku vyaviza visoweru vya Mtuwa Mlungu.

31 Wantu weni haweniyiwuki hawagambilwi matendu gakuyi ga ulopola geni,

Mtuwa Mlungu gakatenditi.