1 Gwee Mlungu, gutulema na kutuposhola,

toziya gutukalalira, shondi gutuwuziyi kayi kwaku.

2 Guyilendemiziya isi na kuyipanta,

gudiwi mibaluka yakuyi nayendeleya.

3 Guwatenda wantu waku wapati ntabika,

twankuwegukaweguka handa yawaloweriti.

4 Guwapanani lilangaliru walii yawakupanana ligoya,

su washapiri msali.

5 Gutulopoli kwa liwoku lyaku lya kumliwu,

su walii yawakufira walopolwi.

6 Mlungu kalonga kulawa pananagala pakuyi,

"Vinu haniyibaguli Shekemu kwa nemeleru,

lulalanda lwa Sukoti hanilupimi vipandivipandi.

7 Gileadi ndo yaneni na Manasi ndo yaneni,

Efraimu kofia yangu ya shuma,

na Yuda ndo luhonga lwangu lwa ukolamlima.

8 Moabu ndo handa bakuli yangu ya kunawira,

shilwatu shaneni hanishasiri Edomu iweri yangu.

Hambotangi kwa ukanka kwa Filistia."

9 Gaa hakampeleki kulushi lwa liboma?

Gaa hakanongoziyi mpaka Edomu?

10 Hashi, gutuleka nakamu, gwee Mlungu?

Mana gugendandiri kayi na mashonta getu.

11 Gututangi kulawa kwa wankondu wetu,

mana utanga wa wantu ufaandiri shintu.

12 Mlungu pakawera uwega watwenga hatukanki,

yomberi hakawakanki wankondu watwenga.