1 Gwee Mlungu, hashi gutuleka?

Mbona gwana maya kwa kondolu wa maliwuziwu gaku?

2 Guliholi lijojoniku lyaku lyagulipatiti makashu,

lyagulikomboliti liweri likabila lya uhala waku,

lugongu Sayuni lwagulutenditi pahala paku pagulikala.

3 Gupiti mumahami aga ga kwanjira makashu.

Wankondu wahalibisiya kila shintu pa numba yaku.

4 Wankondu waku wanemelera ukanka Mnumba Nkulu mwaku,

watula amu bendela zawu za ukanka.

5 Walifana na mkata mbawu,

yakakata mitera kwa liwagu lyakuyi.

6 Wamegitimegiti vintu vyoseri vya mbawu,

kwa liwagu na nyundu zawu.

7 Walunguziyiti motu pananagala paku,

wapatula humba pahala litawu lyaku likwiswa.

8 "Walongiti mumoyu mwawu hatupaagamiziyi nakamu,

pahala poseri paisi,

pawaliwona kumguwira Mlungu."

9 Hapeni tuwoni kayi langaliru kulawa kwa Mlungu,

twahera kayi mbuyi yoseri,

pota kwahera yakavimana upeleru wa goseri aga.

10 Gwee Mlungu, mpakandii wankondu hawakuseki?

Hashi, hawaligirangi litawu lyaku mashaka goseri?

11 Mbona gulififa liwoku lyaku? Yina liwoku lyaku lya kumliwu

gulilaviyi munguwu yaku na guwagamiziyi.

12 Kumbiti gwenga Mlungu ndo mfalumi gwangu kwanjira makashu,

gutenda makulu ga ulopola pasipanu.

13 Kwa uwezu waku ukulu guyibagula bahari,

guyimega mituyi ya wankanyama wakulu wa bahari.

14 Gwenga guyiponditi mituyi ya Lewiatani,

guwapanana wankanyama wa kushiwala shiweri shiboga shawu.

15 Gwenga ndo yagutenditi bwiru za mashi yaziyumandiri

na kuziyumiziya nshemba nkulu.

16 Paluwala ndo paku na pashiru ndo paku,

gutula lyezi na mshenji pahala pakuyi.

17 Gwenga gutula mbaka zoseri ya pasipanu,

gupanga shaka sha mpepu na shaka sha livuki.

18 Gwee Mtuwa Mlungu, guloli mahigiranga ga wankondu waku.

Wantu wazigizigi ntambu yawalibeza litawu lyaku.

19 Naguwasira wanyama wakalipa wang'unda waku,

nagulyaluwa ukomu wa wantu waku yawatabika mashaka goseri.

20 Guliholi lipatanu lyaku,

toziya pahala pa lwindu mu isi pamema unkesera.

21 Naguwaleka yawayonelwa wasoniziwi,

guwatendi wahushu na wananfiru walizyumi litawu lyaku.

22 Gwee Mlungu, gugoloki gulikomangiri gamweni,

guholi ntambu yagwigirangwa na wazigizigi paluwala poseri.

23 Nagulyaluwa mashowanganu ga wankondu waku na

ndewu za mashaka goseri za wasingani waku.