1 Mmwimbili kwa nemeru Mlungu yakawera likakala lyetu,

mmufyapiliri Mlungu gwa Yakobu,

2 Mwanji kwimba, mgombi ngoma,

mgombi miluli na lingutinguti kwa liziwu liherepa.

3 Mgombi lipenka kubwera kulawa kwa lyezi,

na viraa lyezi lya pakati, shaka sha msambu gwetu,

4 ayi ndo lagiru mu Israeli,

ayi ndo lagalira ya Mlungu gwa Yakobu.

5 Kawapananiti wantu wa Israeli lagalira ali,

pakayikomangiti isi ya Misri.

Aku tupikiniriti luga yayimanikandiri,

6 "Neni mbusiyiti visanka vyaku mumawega,

mbusiya vikapu vizotopa kulawa mumawoku mwawu.

7 Paguweriti mkutabika gunshemiti nikulopola.

Nikwankuliti pawera nilififa mulupanta.

Nikujeriti kumashi ga Meriba.

8 Mwenga wantu wangu mpikiniri mabeziwu gangu.

Mbaka memumpikaniri, mwee Israeli.

9 Nakawera kwa gwenga mlungu muhenga.

Naguguwira nakamu mlungu yumonga.

10 Neni ndo Mtuwa Mlungu, Mlungu gwenu,

yanikulaviyeni muisi ya Misri.

Mumamuli milomu yenu na neni hanikuliyiziyeni."

11 "Kumbiti wantu waneni wampikiniritindiri,

Israeli wafiritindiri kunjimira.

12 Hangu, niwaleka wasigali na unkesera wawu,

wafati matakula gawu weni.

13 Tembera wantu wa neni mewampikiniri,

Tembera Israeli mewafati njira zyangu,

14 meniwakanki wankodu wawu kalongola,

meniwakomangi watabisiya wawu.

15 Yawamkalalira Mtuwa mewamnsuntamaliri kwa lyoga,

na nkomangu zyawu meziweri zya mashaka goseri.

16 Kumbiti gwee Israeli menikuliyiziyi kwa nganu iherepa,

Menikwikutuziyi kwa lwashi lwalulawa mulitalabuhi."